గోదావరిఖని / ఆర్జీవన్‌: సింగరేణి కార్మికుల పెండింగ్‌ సమస్యలను వెంటనే పరిష్కరించాలని డిమాండ్‌ చేస్తూ గుర్తింపు సంఘం ఏఐటీయూసీ నాయకులు శనివారం ఆర్జీవన్‌ జీఎం కార్యాలయం ఎదుట ధర్నా నిర్వహించారు. ఆర్జీవన్‌ బ్రాంచ్‌ ఆధ్వర్యంలో జరిగిన ఈ కార్యక్రమంలో సింగరేణి కాలరీస్‌ వర్కర్స్‌ యూనియన్‌ (ఏఐటీయూసీ) ఉప ప్రధాన కార్యదర్శి ఆరెల్లి పోశం సహా పలువురు నాయకులు పాల్గొన్నారు. అనంతరం వారు ఆర్జీవన్‌ జీఎం లలిత్‌ కుమార్‌కు వినతిపత్రం సమర్పించారు.
ఆరెల్లి పోశం మాట్లాడుతూ —
“ఏటీసీ గుర్తింపు సంఘంగా గెలిచిన తర్వాత కార్మికుల సంక్షేమం కోసం కృషి చేస్తున్నాం. అయినప్పటికీ కొన్ని సంఘాలు అసత్య ప్రచారం చేసి కార్మికులను తప్పుదోవ పట్టిస్తున్నాయి,” అని పేర్కొన్నారు. కమిటీల పేరుతో కాలయాపన చేయకుండా పెండింగ్‌ సమస్యలను వెంటనే పరిష్కరించాలని యాజమాన్యాన్ని డిమాండ్‌ చేశారు.
ముఖ్య డిమాండ్లు:
గత ఏడు నెలలుగా నిర్వహించని మెడికల్‌ బోర్డును వెంటనే నిర్వహించాలి.
సొంత ఇంటి పథకం అమలు చేయాలి.
మారుపేర్లపై ఉన్న విజిలెన్స్‌ కేసులు పరిష్కరించాలి.
డిస్మిస్‌ అయిన ఉద్యోగులకు మరోసారి అవకాశం కల్పించాలి.
150 మస్టార్‌ సర్క్యులర్‌ను వెంటనే రద్దు చేయాలి.
జూనియర్‌ అసిస్టెంట్‌ పరీక్షలు త్వరగా నిర్వహించాలి.
మెడికల్‌ ఫిట్‌ అయిన కార్మికుల పిల్లలకు ఉద్యోగాలు ఇవ్వాలి.
కొత్తగూడెం బీజైన్‌ పరిధిలోని వీకే కోల్‌మైన్‌, జెకె ఓపెన్‌ కాస్ట్‌ ఎక్స్టెన్షన్‌ను పర్మినెంట్‌ ఉద్యోగులతోనే నడపాలి.
ఓవర్‌మెన్‌, మైనింగ్‌ సర్దార్‌లకు (DMH) ప్రమోషన్‌లు కల్పించాలి.
ఇన్‌కమ్‌ ట్యాక్స్‌ డిడక్షన్‌ను కోల్ ఇండియా తరహాలో యాజమాన్యమే భరించాలి.
నాయకులు ప్రభుత్వాన్ని, యాజమాన్యాన్ని తీవ్రంగా విమర్శిస్తూ, “సింగరేణికి రావాల్సిన కోట్లాది బకాయిలపై ఒత్తిడి చేయకపోవడం వల్లే అనేక సమస్యలు తలెత్తుతున్నాయి. కేంద్ర–రాష్ట్ర ప్రభుత్వాల కార్మిక వ్యతిరేక విధానాలే ఇందుకు కారణం,” అని అన్నారు.
“ఎప్పటికైనా కార్మికుల పక్షాన పోరాడేది ఏకైక సంఘం ఏఐటీయూసీ మాత్రమే. కార్మిక హక్కుల పరిరక్షణ కోసం ఎలాంటి పోరాటానికైనా సిద్ధంగా ఉన్నాం,” అని వారు హామీ ఇచ్చారు.
యాజమాన్యం త్వరగా స్పందించి సమస్యలను పరిష్కరించకపోతే, రాబోయే రోజుల్లో నిరోధక సమ్మెతో సహా పెద్ద ఎత్తున ఆందోళనలు చేపడతామని హెచ్చరించారు.
ఈ కార్యక్రమంలో ఏఐటీయూసీ నాయకులు సంకె అశోక్‌, మాదన మహేష్‌, రంగు శీను, ఎస్‌. వెంకట్‌ రెడ్డి, గండి ప్రసాద్‌, బోగ సతీష్‌బాబు, ఆకునూరు శంకరయ్య, దొంత సాయన్న, ఎం. చక్రపాణి, సిద్దమల్లు రాజు, సిర్రా మల్లికార్జున్‌, సయ్యద్‌ సోహెల్‌, చెప్యాల భాస్కర్‌, ఏఐటీయూసీ వర్కింగ్‌ ప్రెసిడెంట్‌ ఎం.ఎ. గౌస్‌, మానాల శ్రీనివాస్‌, పొన్నాల వెంకటయ్య, కారంపురీ వెంకన్న, గుర్రం ప్రభుదాస్‌, గోడిశెల నరేష్‌, బండిమల్లేశ్‌, దాసరి శ్రీనివాస్‌, ఎం. సత్యనారాయణ, తొడుపునూరి రమేష్‌ తదితరులు పాల్గొన్నారు.
