మెదక్ జిల్లా టేక్మాల్ ఎస్సై రాజేష్ ఒక కేసులో రూ. 40 వేలు లంచం తీసుకుంటూ ఏసీబీకి చిక్కాడు. ఏసీబీ అధికారులను చూసి పంట పొలాల్లోకి పారిపోగా.. అధికారులు అతన్ని వెంబడించి పట్టుకున్నారు. ఎస్సై అరెస్టు కావడంతో గ్రామస్థులు పోలీస్ స్టేషన్ ఎదుట టపాసులు కాల్చి సంబరాలు చేసుకున్నారు. గతంలో సాగునీటి శాఖ అదనపు కార్యదర్శులు, రెవెన్యూ తహసీల్దార్లను కూడా ఏసీబీ అరెస్టు చేసింది. దీనికి సంబంధించి పూర్తి వివరాలు ఇలా ఉన్నాయి.
తెలంగాణ రాష్ట్రంలో అవినీతి నిరోధక శాఖ (ACB) అధికారులు ఇటీవల తమ కార్యకలాపాలను ముమ్మరం చేశారు. అవినీతికి పాల్పడుతున్న అధికారుల భరతం పడుతూ.. సామాన్య ప్రజలకు న్యాయం లభించేలా చూస్తున్నారు. ఈ క్రమంలో.. లంచం తీసుకోవాలంటేనే అధికారులు భయపడే వాతావరణాన్ని తీసుకొస్తున్నారు. ఏసీబీ దూకుడును ప్రజలు, గ్రామస్థులు ప్రశంసిస్తున్నారు.
తాజాగా.. మెదక్ జిల్లాలోని టేక్మాల్ ఎస్సై రాజేష్ ఏసీబీ వలలో చిక్కారు. ఒక కేసు విషయంలో ఎస్సై రాజేష్ లంచంగా రూ. 40 వేలు డిమాండ్ చేశారు. బాధితుడి ఫిర్యాదు మేరకు ఏసీబీ అధికారులు పక్కా ప్రణాళికతో రంగంలోకి దిగారు. ఎస్సై రాజేష్ లంచం డబ్బులు తీసుకుంటుండగా.. ఏసీబీ అధికారులు అకస్మాత్తుగా రంగంలోకి దిగారు. ఏసీబీ అధికారులను చూసి భయపడిన ఎస్సై రాజేష్, వెంటనే పంట పొలాల్లోకి పారిపోయాడు. ఏసీబీ అధికారులు కూడా ఏ మాత్రం వెనుకాడకుండా ఎస్సైను వెంబడించి పట్టుకున్నారు. వెంటనే పోలీస్ స్టేషన్‌కు తీసుకొచ్చి విచారణ చేపట్టారు.
