మహాత్మా గాంధీ జాతీయ గ్రామీణ ఉపాధి హామీ పథకంలో (MGNREGS) ఫీల్డ్ అసిస్టెంట్లుగా విధులు నిర్వహిస్తున్న ఉద్యోగులు గురువారం స్థానిక టీడీపీ కార్యాలయంలో నియోజకవర్గ ఎమ్మెల్యే బొనెల విజయచంద్రను కలసి తమ సమస్యలపై వినతిపత్రాన్ని అందజేశారు.
19 సంవత్సరాలుగా ఫీల్డ్ అసిస్టెంట్లుగా సేవలు అందిస్తున్నా సరైన ఉద్యోగ భద్రత లేదని వారు ఆవేదన వ్యక్తం చేశారు. నెలకు కేవలం రూ. 26,000 వేతనం మాత్రమే అందుతున్నదని, మ్యాన్ డేస్ టార్గెట్ విధానాన్ని రద్దు చేసి వారిని శాశ్వతంగా గుర్తించాలనే డిమాండ్ చేశారు.
వారు అందజేసిన వినతిపత్రంలో ఉద్యోగ భద్రత, వేతన పెంపు, మ్యాన్ డేస్ టార్గెట్ రద్దు వంటి ప్రధాన అంశాలు ఉన్నాయని తెలుస్తోంది. ఇప్పటికైనా ప్రభుత్వం తమ సమస్యలను గుర్తించి, శాశ్వత పరిష్కారాలు తీసుకురావాలని వారు విజ్ఞప్తి చేశారు.
వినతిపత్రాన్ని స్వీకరించిన ఎమ్మెల్యే విజయచంద్ర మాట్లాడుతూ, “ఫీల్డ్ అసిస్టెంట్ల సమస్యను ప్రభుత్వ దృష్టికి తీసుకెళ్లి, తగిన న్యాయం జరిగేలా చూస్తా”ని హామీ ఇచ్చారు. ఈ సమావేశంలో టీడీపీ నాయకులు కూడా పాల్గొన్నారు.
ప్రభుత్వం వెంటనే స్పందించి, పథకానికి మూలస్థంభంగా ఉన్న ఫీల్డ్ అసిస్టెంట్లకు శాశ్వత ఉద్యోగ భద్రత కల్పించాలని ఉద్యోగులు కోరుతున్నారు.
