తూప్రాన్ డివిజన్ : రాబోయే గణేశ్ నవరాత్రి ఉత్సవాల నేపథ్యంలో మెదక్ జిల్లా తూప్రాన్ టౌన్‌లోని శివ సాయి గార్డెన్ వద్ద ఈరోజు పీస్ కమిటీ సమావేశం జరిగింది. ఈ సమావేశానికి ముఖ్య అతిథిగా తూప్రాన్ డీఎస్పీ జె. నరేందర్ గౌడ్ హాజరయ్యారు. ఆయనతో పాటు తూప్రాన్ సీఐ రంగ కృష్ణ, తూప్రాన్, మనోహరాబాద్, శివ్వంపేట, వెల్దుర్తి ఎస్‌ఐలు, సంబంధిత మండలాల పీస్ కమిటీ సభ్యులు, గణేశ్ విగ్రహ మండపాల నిర్వాహకులు పాల్గొన్నారు.
సమావేశంలో డీఎస్పీ నరేందర్ గౌడ్ మాట్లాడుతూ,
“గణేశ్ ఉత్సవాలను శాంతియుతంగా, సామరస్యంతో జరుపుకోవాలి. ఎవరి మతభావాలను దెబ్బతీయకుండా, అందరి సహకారంతో పండుగను ఘనంగా నిర్వహించాలి,” అని సూచించారు.
మండపాలలో డీజే వాడకాన్ని నిషేధించాలి
సరైన విద్యుత్ కనెక్షన్లు, వైరింగ్ ఉండాలి
ప్రతి మండపంలో కనీసం ఇద్దరు నిర్వాహకులు ఉండటం తప్పనిసరి
భద్రతా చర్యల కోసం పోలీసులు అన్ని విధాలుగా సహకరిస్తారు
తూప్రాన్ సీఐ రంగ కృష్ణ మాట్లాడుతూ, ఉత్సవాల్లో ఎలాంటి అవాంఛనీయ ఘటనలు జరగకుండా క్రమశిక్షణ పాటించాలని, నిర్వాహకులు, కమిటీ సభ్యులు, ప్రజలు పోలీసులకు తోడుగా ఉండాలని విజ్ఞప్తి చేశారు.
“భద్రతా చర్యలతో పాటు ప్రజల భాగస్వామ్యం ఉంటే ఉత్సవాలు మరింత విజయవంతంగా సాగుతాయి,” అని పేర్కొన్నారు.
ఈ సమావేశంలో పాల్గొన్న గణేశ్ మండపాల నిర్వాహకులు, పీస్ కమిటీ సభ్యులు, పోలీసుల సూచనలను పూర్తిగా పాటించేందుకు అంగీకారం తెలిపారు.
తూప్రాన్ వాసులు కలిసికట్టుగా గణేశ్ ఉత్సవాలను ఘనంగా, శాంతియుతంగా నిర్వహించేందుకు సిద్ధంగా ఉన్నారు.
