పార్వతీపురం : ఈవీఎం భద్రతా గిడ్డంగి వద్ద పనిచేస్తున్న సిబ్బంది ఎప్పటికప్పుడు అప్రమత్తంగా ఉండాలని జిల్లా కలెక్టర్ డా. ఎన్. ప్రభాకర రెడ్డి ఆదేశించారు. జిల్లా కేంద్రంలో ఉన్న ఈవీఎం, వీవీప్యాట్ భద్రతా గిడ్డంగిని ఆయన గురువారం రాజకీయ పార్టీల ప్రతినిధుల సమక్షంలో తనిఖీ చేశారు.
గిడ్డంగి భద్రత, నిర్వహణపై సమగ్రంగా సమీక్ష నిర్వహించిన కలెక్టర్, ప్రతి మూడు నెలలకు ఒకసారి జరిగే సాధారణ తనిఖీలలో భాగంగా ఈ పరిశీలన చేపట్టినట్లు తెలిపారు. గిడ్డంగి వద్ద ఏర్పాటు చేసిన సీసీటీవీ నిఘా వ్యవస్థ, పోలీసు భద్రతను పరిశీలించిన ఆయన భద్రతా రిజిస్టర్లను తనిఖీ చేసి, విధుల్లో ఉన్న సిబ్బంది ఎల్లప్పుడూ జాగ్రత్తగా ఉండాలని సూచించారు.
ఈవీఎంల నిల్వ సామర్థ్యం, గిడ్డంగిలో సరైన గాలి, వెలుతురు ఉండేలా చూడాలని, తేమ చేరకుండా తగిన చర్యలు తీసుకోవాలని అధికారులకు సూచించారు. అలాగే అగ్నిమాపక పరికరాలు ఎల్లప్పుడూ సక్రమంగా పనిచేసేలా ఉండాలని స్పష్టం చేశారు.
ఎన్నికల కమిషన్ నిబంధనల ప్రకారం గిడ్డంగి సీల్స్ సరిగా ఉన్నాయని కలెక్టర్ ధృవీకరించారు. అనంతరం స్టాక్ రిజిస్టర్లో నమోదైన వివరాలను ఈవీఎంలు, కంట్రోల్ యూనిట్లు, వీవీప్యాట్ల అసలు సంఖ్యతో సరిపోల్చి పరిశీలించారు.
ఈ తనిఖీలో జిల్లా రెవెన్యూ అధికారి కె. హేమలత, సబ్ కలెక్టర్ ఆర్. వైశాలి, వివిధ రాజకీయ పార్టీల ప్రతినిధులు, రెవెన్యూ మరియు ఎన్నికల విభాగాల అధికారులు, సిబ్బంది పాల్గొన్నారు.
