కొమరాడ: పంచాయతీల సమగ్ర అభివృద్ధిని లక్ష్యంగా కేంద్ర ప్రభుత్వం రూపొందించిన పంచాయతీ అడ్వాన్స్మెంట్ ఇండెక్స్ (PAI) పై అవగాహన కల్పించేందుకు కొమరాడ మండలంలో గురువారం ఒక రోజు ఓరియంటేషన్ కార్యక్రమం నిర్వహించబడింది. 2025-26 వార్షిక ప్రణాళిక రూపొందింపు లో భాగంగా ఈ శిక్షణా కార్యక్రమం జరగడం విశేషం.
ఈ కార్యక్రమంలో పంచాయతీ అభివృద్ధి ప్రణాళిక (PDP) లో భాగమైన కీలకమైన 9 థీమ్స్ పై ఆయా శాఖల అధికారులు వివరణాత్మకంగా వివరించారు. ప్రతి థీమ్‌కు సంబంధించిన సూచికలు, లక్ష్యాలు, వాటిని సాధించేందుకు అవలంబించాల్సిన వ్యూహాలపై పంచాయతీ సిబ్బందికి, కార్యదర్శులకు స్పష్టమైన దిశానిర్దేశం అందించారు.
9 థీమ్స్ & వాటి ముఖ్యాంశాలు:
పేదరిక నిర్మూలన మరియు జీవనోపాధి: గ్రామాల్లో ఉపాధి అవకాశాలు పెంచడం, పేదరిక నిర్మూలన.
ఆరోగ్యకరమైన గ్రామపంచాయతీ: ప్రాథమిక వైద్య సేవల అభివృద్ధి, ప్రజారోగ్యంపై దృష్టి.
నీటి సమృద్ధి: తాగునీరు, సాగునీటి నిర్వహణ, నీటి వనరుల పరిరక్షణ.
పచ్చదనం & పరిశుభ్రత: ఘన వ్యర్థాల నిర్వహణ, మొక్కల పెంపకం, శుభ్రతపై దృష్టి.
మౌలిక సదుపాయాలు: రహదారులు, విద్యుత్, ఇంటర్నెట్ వంటి అవసరాల కల్పన.
సామాజిక భద్రత: వృద్ధులు, వికలాంగులు, అణగారిన వర్గాల సంక్షేమం.
సుపరిపాలన: పారదర్శకత, బాధ్యతా పరిపాలన, పౌర సేవల వేగవంతం.
మహిళా సాధికారత: లింగ సమానత్వం, మహిళా భద్రత, మహిళలలో నైపుణ్యాల అభివృద్ధి.
స్వయం సమృద్ధి: పంచాయతీ ఆదాయ వనరుల పెంపుదల, ఆర్థిక స్థిరత్వం.
ఈ అంశాలపై ఏఎస్ఓ సతీశ్ (పార్వతీపురం) శిక్షణ ఇచ్చారు. పీఏఐ సూచికలను చేరుకోవడానికి అవసరమైన చర్యల గురించి అవగాహన కల్పించారు.
కార్యక్రమానికి ఎంపీపీ శ్యామల అధ్యక్షత వహించగా, వివిధ మండల స్థాయి అధికారులు, ఎంపీటీసీలు, సర్పంచులు, పంచాయతీ కార్యదర్శులు పెద్ద ఎత్తున పాల్గొన్నారు. శిక్షణా కార్యక్రమం పంచాయతీల ప్రణాళికా రూపకల్పనకు ఓ దిశగా మారుతుందని అధికారులు విశ్వాసం వ్యక్తం చేశారు.
