పార్వతిపురం మన్యం జిల్లా జియ్యమ్మవలస మండలంలో ఆదివారం పల్స్ పోలియో కార్యక్రమం అత్యంత ఉత్సాహంగా కొనసాగింది. మండలం వ్యాప్తంగా చిన్నారులకు పోలియో చుక్కలు వేయడంలో వైద్య సిబ్బంది చురుకుగా పాల్గొన్నారు.
జియ్యమ్మవలస ప్రాథమిక ఆరోగ్య కేంద్రం పరిధిలో ఏర్పాటు చేసిన పోలియో బూత్లను జిల్లా RBSK & NCDCD ప్రోగ్రామ్ ఆఫీసర్ డాక్టర్ జగన్మోహన్ స్వయంగా సందర్శించి కార్యక్రమ నిర్వహణను పర్యవేక్షించారు. క్షేత్రస్థాయిలో ముమ్మర తనిఖీలు నిర్వహిస్తూ, మండలంలోని ఇటక, జి.టి. వాడ, జోగులదుమ్మ, బి.జె.పురం, పెద్దమేరంగి తదితర గ్రామాల్లో ఏర్పాటు చేసిన పోలియో బూత్లను ఆయన పరిశీలించారు. చిన్నారులకు చుక్కల మందు వేస్తున్న విధానాన్ని గమనించి సిబ్బందికి పలు సూచనలు చేశారు.
ఈ సందర్భంగా డాక్టర్ జగన్మోహన్ మాట్లాడుతూ, ఐదేళ్లలోపు ప్రతి చిన్నారికి తప్పనిసరిగా పోలియో చుక్కలు వేయడం ద్వారా మాత్రమే పోలియో రహిత సమాజాన్ని నిర్మించగలమని పేర్కొన్నారు. తల్లిదండ్రులు ఈ కార్యక్రమానికి పూర్తి సహకారం అందించాలని ఆయన కోరారు.
జిల్లా అధికారితో పాటు జియ్యమ్మవలస వైద్య అధికారులు డాక్టర్ జగదీష్, డాక్టర్ సాయి ప్రసన్న కూడా మండలంలోని వివిధ ప్రాంతాల్లో పర్యటించి పలువురు పోలియో బూత్లను సందర్శించారు. ఈ సందర్భంగా చిన్నారుల తల్లిదండ్రులకు పోలియో నివారణపై అవగాహన కల్పించారు.
అదేవిధంగా, బూత్లలో చుక్కల మందు వేయించుకోలేకపోయిన చిన్నారుల కోసం సోమ, మంగళవారాల్లో వైద్య సిబ్బంది మరియు ఆశా కార్యకర్తలు ఇంటింటికీ వెళ్లి పోలియో చుక్కలు వేస్తారని అధికారులు తెలిపారు. ప్రతి ఒక్కరూ ఈ అవకాశాన్ని సద్వినియోగం చేసుకొని తమ పిల్లల భవిష్యత్తును సురక్షితంగా నిలుపుకోవాలని వారు విజ్ఞప్తి చేశారు.
