సిరిసిల్ల: సిరిసిల్ల కొత్త జిల్లా కలెక్టర్‌గా నియమితులైన హరిత అధికారికంగా తన బాధ్యతలను సోమవారం స్వీకరించారు. జిల్లా కలెక్టర్ కార్యాలయంలో జరిగిన ఈ కార్యక్రమంలో ఆమెను అధికారులు, సిబ్బంది హర్షాతిరేకాలతో స్వాగతించారు.
ఈ సందర్భంగా హరిత మాట్లాడుతూ, “జిల్లా అభివృద్ధి, ప్రజల కోసం అన్ని విభాగాలతో సమన్వయంతో పనిచేస్తాను. ప్రభుత్వ సంక్షేమ కార్యక్రమాలను ప్రజలకు చేరవేసే విధంగా పని చేస్తాం” అని పేర్కొన్నారు.
స్వచ్చత, పారదర్శకత, ప్రజలతో నేరుగా మమేకమవుతూ సమస్యలు పరిష్కరించడమే తన ముఖ్య లక్ష్యంగా హరిత తెలిపారు. సిరిసిల్ల జిల్లాను అన్ని రంగాల్లో అభివృద్ధి చేసే దిశగా కార్యాచరణ ప్రణాళిక రూపొందిస్తామని చెప్పారు.
ఈ కార్యక్రమంలో జిల్లా అధికారులు, వివిధ శాఖల సిబ్బంది, ప్రజాప్రతినిధులు పాల్గొన్నారు.
