మెట్పల్లి : జగిత్యాల జిల్లా మెట్పల్లిలో రూ.63 వేల లంచం తీసుకుంటుండగా సీడీపీఓ పద్మను ఏసీబీ అధికారులు శనివారం పట్టుకున్నట్లు అధికారులు తెలిపారు.
ఏసీబీ అధికారుల వివరాల ప్రకారం.. మెట్పల్లి అర్బన్ సెక్టార్ పరిధిలోని 21 అంగన్వాడీ కేంద్రాలను తనిఖీ చేసే సమయంలో ప్రతికూల వ్యాఖ్యలు నమోదు చేయకుండా అనుకూలంగా వ్యవహరించేందుకు సీడీపీఓ పద్మ లంచం డిమాండ్ చేసినట్లు ఫిర్యాదు అందింది. ఒక్కో అంగన్వాడీ కేంద్రం నుంచి నెలకు రూ.1,000 చొప్పున, మూడు నెలలకు రూ.3,000 చొప్పున 21 కేంద్రాలకు కలిపి మొత్తం రూ.63,000 లంచంగా ఇవ్వాలని డిమాండ్ చేసినట్లు ఏసీబీ పేర్కొంది.
ఫిర్యాదు ఆధారంగా ఏసీబీ అధికారులు పక్కా ప్రణాళికతో ట్రాప్ నిర్వహించారు. ఫిర్యాదుదారుడి నుంచి రూ.63,000 నగదును అధికారిణి నేరుగా స్వీకరిస్తుండగా ఏసీబీ అధికారులు ఆమెను పట్టుకున్నట్లు తెలిపారు. ఆమె వద్ద నుంచి లంచం నగదును స్వాధీనం చేసుకున్నారు.
కరీంనగర్ రేంజ్ ఇన్చార్జి ఏసీబీ డీఎస్పీ గొర్రె మధు ఆధ్వర్యంలో ఈ ట్రాప్ నిర్వహించినట్లు సమాచారం. అనంతరం సీడీపీఓ పద్మను ఏసీబీ అధికారులు అదుపులోకి తీసుకున్నారు.
నిందితురాలిని కరీంనగర్లోని ఎస్పీఈ, ఏసీబీ కేసుల ప్రత్యేక న్యాయస్థానం ఎదుట జ్యుడిషియల్ రిమాండ్ కోసం హాజరుపరచనున్నట్లు అధికారులు తెలిపారు. ఈ వ్యవహారంపై దర్యాప్తు కొనసాగుతోందని పేర్కొన్నారు. ఫిర్యాదుదారుడి భద్రత దృష్ట్యా ఆయన వివరాలను గోప్యంగా ఉంచినట్లు ఏసీబీ అధికారులు వెల్లడించారు.
