కొమరం భీమ్ ఆసిఫాబాద్ జిల్లా, కాగజ్నగర్ పట్టణంలోని మెగ్ గోపి హై స్కూల్ 14వ వార్షికోత్సవ వేడుకలు ఆదివారం అత్యంత ఘనంగా నిర్వహించారు. పాఠశాల ప్రాంగణం విద్యార్థులు, తల్లిదండ్రులు, అతిథులతో కళకళలాడింది.
ఈ కార్యక్రమానికి మాజీ జడ్పీ వైస్ చైర్మన్ కోనేరు కృష్ణారావు, ఎంఈఓ వాసాల ప్రభాకర్, కౌన్సిలర్ కచ్చకాయల జ్యోతి ముఖ్య అతిథులుగా హాజరై వేడుకలను ప్రారంభించారు.
ఈ సందర్భంగా కోనేరు కృష్ణారావు మాట్లాడుతూ, విద్యార్థుల భవిష్యత్తు మంచి చదువుతోనే మారుతుందని పేర్కొన్నారు. క్రమశిక్షణతో చదువుకుంటే ఉన్నత స్థానాలను అధిరోహించవచ్చని ఆయన సూచించారు.
ఎంఈఓ వాసాల ప్రభాకర్ మాట్లాడుతూ, పిల్లల ఆసక్తులను గుర్తించి తల్లిదండ్రులు వారిని ప్రోత్సహించాలని సూచించారు. విద్యతో పాటు సాంస్కృతిక కార్యక్రమాల్లోనూ పాల్గొనడం విద్యార్థుల సమగ్రాభివృద్ధికి దోహదపడుతుందని తెలిపారు.
కార్యక్రమంలో విద్యార్థులు ప్రదర్శించిన నృత్యాలు, పాటలు ఆహూతులను ఆకట్టుకున్నాయి. మిక్కీమౌస్ వంటి ప్రత్యేక వేషధారణలు చిన్నారుల్లో ఉత్సాహాన్ని నింపాయి.
పాఠశాల కరస్పాండెంట్ తాజుద్దీన్ మాట్లాడుతూ, విద్యార్థుల భవిష్యత్తు తమ బాధ్యతగా భావిస్తూ వారికి నాణ్యమైన విద్య అందించడానికి కృషి చేస్తున్నామని తెలిపారు.
ఈ వేడుకలో ప్రైవేట్ పాఠశాలల కరస్పాండెంట్లు, ఉపాధ్యాయులు, మరియు పెద్ద సంఖ్యలో తల్లిదండ్రులు పాల్గొని కార్యక్రమాన్ని విజయవంతం చేశారు.
