గోదావరిఖని : సెల్ఫోన్ పోగొట్టుకున్నా, దొంగిలించబడినా ప్రజలు వెంటనే సీఈఐఆర్ (CEIR) పోర్టల్లో ఫిర్యాదు నమోదు చేసి దాన్ని సద్వినియోగం చేసుకోవాలని రామగుండం పోలీస్ కమిషనర్ అంబర్ కిషోర్ ఝా సూచించారు. సీఈఐఆర్ పోర్టల్ ద్వారా పోగొట్టుకున్న, చోరీకి గురైన మొబైల్ ఫోన్లను గుర్తించడంతోపాటు వాటిని తిరిగి యజమానులకు అందించే అవకాశం ఉందని తెలిపారు.
మంగళవారం రామగుండం పోలీస్ కమిషనరేట్ పరిధిలో సెల్ఫోన్ రికవరీ మేళా నిర్వహించారు. పోలీస్ కమిషనర్ ఆదేశాల మేరకు సీసీఎస్ ఏసీపీలు రవీందర్, ప్రవీణ్ కుమార్ నేతృత్వంలో సీసీఎస్, ఐటీ సెల్ బృందాలు ప్రత్యేకంగా కృషి చేసి పోగొట్టుకున్న, చోరీకి గురైన మొబైల్ ఫోన్లను గుర్తించి స్వాధీనం చేసుకున్నాయి.
ఈ సందర్భంగా రికవరీ చేసిన 142 సెల్ఫోన్లను, మొత్తం సుమారు రూ.27.40 లక్షల విలువైన మొబైల్ ఫోన్లను వాటి అసలు యజమానులకు సీపీ అంబర్ కిషోర్ ఝా చేతుల మీదుగా అందజేశారు. తమ ఫోన్లు తిరిగి లభించడంతో బాధితులు పోలీసులకు కృతజ్ఞతలు తెలిపారు.
10,420 ఫిర్యాదులు.. 3,717 ఫోన్ల రికవరీ
సీపీ అంబర్ కిషోర్ ఝా మాట్లాడుతూ, రామగుండం పోలీస్ కమిషనరేట్ పరిధిలో ఇప్పటివరకు 10,420 మంది సీఈఐఆర్ పోర్టల్లో ఫిర్యాదులు నమోదు చేయగా, 3,717 సెల్ఫోన్లను పోలీసులు రికవరీ చేసి యజమానులకు అందజేసినట్లు తెలిపారు. గత కొంతకాలంగా సీసీఎస్, ఐటీ సెల్ పోలీసులు ప్రత్యేక దృష్టి సారించి మరో 142 మొబైల్ ఫోన్లను గుర్తించి స్వాధీనం చేసుకున్నారని వెల్లడించారు.
పోగొట్టుకున్న, చోరీకి గురైన సెల్ఫోన్లను గుర్తించేందుకు సీసీఎస్తోపాటు ప్రతి పోలీస్ స్టేషన్ పరిధిలో ప్రత్యేక విభాగాలను ఏర్పాటు చేసినట్లు సీపీ తెలిపారు. సాంకేతిక పరిజ్ఞానాన్ని వినియోగిస్తూ మొబైల్ ఫోన్ల ఆచూకీని గుర్తించేందుకు పోలీసులు నిరంతరం పనిచేస్తున్నారని చెప్పారు.
ఫోన్ పోతే వెంటనే ఫిర్యాదు చేయాలి
ప్రస్తుత జీవన విధానంలో మొబైల్ ఫోన్ అత్యంత కీలకమైన సాధనంగా మారిందని సీపీ పేర్కొన్నారు. సమాచారం తెలుసుకోవడం, నగదు లావాదేవీలు, ఆన్లైన్ దరఖాస్తులు, ఇతర డిజిటల్ సేవల కోసం ప్రజలు మొబైల్ ఫోన్లపై ఎక్కువగా ఆధారపడుతున్నారని తెలిపారు.
ఎవరైనా తమ మొబైల్ ఫోన్ను పోగొట్టుకున్నా లేదా దొంగిలించబడినా ఆలస్యం చేయకుండా సీఈఐఆర్ పోర్టల్లో ఫిర్యాదు నమోదు చేయడంతోపాటు, సంబంధిత పోలీస్ స్టేషన్లో సమాచారం ఇవ్వాలని సూచించారు.
సీఈఐఆర్ పోర్టల్లో మొబైల్ ఫోన్ వివరాలు నమోదు చేయడం ద్వారా ఆ ఫోన్ను ఇతర నెట్వర్క్లలో లేదా ఇతర ప్రాంతాల్లో వినియోగించకుండా నిరోధించే అవకాశం ఉంటుందని సీపీ తెలిపారు. దీనివల్ల చోరీకి గురైన ఫోన్లను అక్రమంగా వినియోగించడం కష్టతరమవుతుందని, ఫోన్లను తిరిగి గుర్తించి యజమానులకు అందించే అవకాశాలు పెరుగుతాయని వివరించారు.
మొబైల్ ఫోన్ చోరీలను అరికట్టడంలో, పోగొట్టుకున్న ఫోన్లను తిరిగి పొందడంలో సీఈఐఆర్ వ్యవస్థ కీలకంగా పనిచేస్తోందని ఆయన పేర్కొన్నారు. ప్రజలు ఈ సదుపాయాన్ని పూర్తి స్థాయిలో వినియోగించుకోవాలని కోరారు.
ఈ కార్యక్రమంలో అదనపు డీసీపీ (పరిపాలన) కె. శ్రీనివాస్, సీసీఎస్ ఏసీపీలు రవీందర్, ప్రవీణ్ కుమార్, వై. కృష్ణారెడ్డి, టి. గోపి, పి. బాలాజీ వరప్రసాద్, ఐటీ కోర్ ఇన్స్పెక్టర్ చంద్రశేఖర్ గౌడ్, ఎస్ఐలు బి. జీవన్, ఎం. చంద్రశేఖర్, ఎం.ఏ. నసీర్, ఎం. శివకేశవులు, కె. భాస్కర్ రావు, బి. భూమన్న, బి. శిరీష, శెట్టి లలితతో పాటు పలువురు పోలీసు అధికారులు, సిబ్బంది పాల్గొన్నారు.
