కరీంనగర్: జిల్లాలో పెరుగుతున్న సైబర్ నేరాలను అరికట్టేందుకు కఠిన చర్యలు తీసుకుంటామని కరీంనగర్ పోలీస్ కమిషనర్ గౌష్ ఆలం, ఐపీఎస్ తెలిపారు. ఈ మేరకు ఆదివారం కమిషనరేట్ కార్యాలయంలో జిల్లాలోని అన్ని బ్యాంకుల అధికారులతో ప్రత్యేక సమీక్ష సమావేశం నిర్వహించారు.
ఈ సందర్భంగా ఆయన మాట్లాడుతూ, సైబర్ నేరగాళ్లు మ్యూల్ ఖాతాల ద్వారా ప్రజల సొమ్మును దారి మళ్లిస్తున్నారని, వాటిని అరికట్టడంలో బ్యాంకర్ల పాత్ర కీలకమని పేర్కొన్నారు. పోలీసులు–బ్యాంకర్లు సమన్వయంతో పనిచేస్తేనే ఈ నేరాలను సమర్థవంతంగా నియంత్రించగలమని స్పష్టం చేశారు.
ఆపరేషన్ క్రాక్డౌన్ 1.0 ఫలితాలు
ఇటీవల చేపట్టిన “ఆపరేషన్ క్రాక్డౌన్ 1.0”లో భాగంగా నాలుగు బ్యాంకు శాఖల్లో 34 మ్యూల్ ఖాతాలను గుర్తించినట్లు సీపీ వెల్లడించారు. ఇప్పటివరకు 20 ఎఫ్ఐఆర్లు నమోదు చేసి, 26 మంది నిందితులను అరెస్టు చేసినట్లు తెలిపారు.
ఖాతాల ప్రారంభంలో కఠిన నిబంధనలు
సేవింగ్స్, కరెంట్ ఖాతాలను నిందితులు సులభంగా తెరుస్తున్న నేపథ్యంలో ఇకపై ఖాతా ప్రారంభంలో కఠిన తనిఖీలు నిర్వహించాలని బ్యాంకర్లకు ఆదేశించారు. ముఖ్యంగా కరెంట్ ఖాతాల విషయంలో డాక్యుమెంట్ వెరిఫికేషన్తో పాటు సైట్ వెరిఫికేషన్ తప్పనిసరి చేయాలని సూచించారు.
బ్యాంకు సిబ్బందికి హెచ్చరిక
కొన్ని కేసుల్లో బ్యాంకు సిబ్బంది సహకారం ఉన్నట్లు ప్రాథమికంగా గుర్తించినట్లు పేర్కొన్న సీపీ, ఎవరైనా నిందితులతో కుమ్మక్కైతే కఠిన చట్టపరమైన చర్యలు తీసుకుంటామని హెచ్చరించారు.
ఆపరేషన్ క్రాక్డౌన్ 2.0
ఇప్పటికే గుర్తించిన 34 ఖాతాలపై ధృవీకరణ పూర్తయిందని, మిగిలిన అనుమానాస్పద ఖాతాలను “ఆపరేషన్ క్రాక్డౌన్ 2.0”లో భాగంగా క్షుణ్ణంగా పరిశీలించనున్నట్లు తెలిపారు.
ముందస్తు జాగ్రత్తలు
అనుమానాస్పద లావాదేవీలు గుర్తించిన వెంటనే పోలీసులకు సమాచారం అందించాలని, ఏటీఎం కేంద్రాల్లో సీసీటీవీ పర్యవేక్షణను బలోపేతం చేయాలని సూచించారు. సైబర్ నేరాలను అడ్డుకునేందుకు బ్యాంకులు సాంకేతికంగా మరింత అప్రమత్తంగా ఉండాలని అన్నారు.
జిల్లాను సైబర్ నేర రహితంగా తీర్చిదిద్దేందుకు పోలీసులు మరియు బ్యాంకింగ్ వ్యవస్థ కలిసికట్టుగా పనిచేయాలని పోలీస్ కమిషనర్ గౌష్ ఆలం పిలుపునిచ్చారు.
