నల్గొండ జిల్లా, చింతపల్లి: గురు పౌర్ణమి పర్వదినాన్ని పురస్కరించుకొని నల్గొండ జిల్లా చింతపల్లిలోని శ్రీ సాయి సన్నిధిలో వెలసిన శ్రీ షిర్డీ సాయి బాబా స్వామివారి ఆలయంలో నిర్వహించిన ప్రత్యేక పూజా కార్యక్రమాలు భక్తిశ్రద్ధలతో జరిగాయి. ఈ కార్యక్రమంలో వైఎస్సార్ కాంగ్రెస్ పార్టీ పల్నాడు జిల్లా అధ్యక్షుడు పిన్నెల్లి రామకృష్ణారెడ్డి సతీసమేతంగా పాల్గొని స్వామివారిని దర్శించుకుని ప్రత్యేక పూజలు నిర్వహించారు.
ఈ సందర్భంగా ఆలయ వేద పండితులు పిన్నెల్లి రామకృష్ణారెడ్డి దంపతులకు వేదాశీర్వచనాలు అందజేయగా, అనంతరం స్వామివారి తీర్థప్రసాదాలను స్వీకరించారు. గురు పౌర్ణమి సందర్భంగా శ్రీ షిర్డీ సాయి బాబా ఆశీస్సులతో రాష్ట్ర ప్రజలందరికీ సుఖశాంతులు, ఆయురారోగ్యాలు, ఆనందం, ఐశ్వర్యం కలగాలని వారు ప్రార్థించారు.
ఆలయానికి విచ్చేసిన భక్తులతో కలిసి ఆధ్యాత్మిక కార్యక్రమాల్లో పాల్గొన్న పిన్నెల్లి రామకృష్ణారెడ్డి, గురు పౌర్ణమి మహోత్సవాల ప్రాధాన్యాన్ని గుర్తు చేస్తూ, గురువుల ఆశీస్సులు ప్రతి ఒక్కరి జీవితానికి మార్గదర్శకంగా నిలవాలని ఆకాంక్షించారు. కార్యక్రమంలో ఆలయ నిర్వాహకులు, అర్చకులు, భక్తులు పాల్గొన్నారు.
