తూప్రాన్ : ఎన్హెచ్–44 హైవేపై ఉన్న దాబాలు, హోటళ్లలో నిబంధనలకు విరుద్ధంగా మద్యం సేవించేందుకు అనుమతిస్తున్న వారిపై పోలీసులు చర్యలు చేపట్టారు. తూప్రాన్ పోలీస్ స్టేషన్ పరిధిలోని హైవేపై ఆదివారం పోలీసులు ఆకస్మిక తనిఖీలు నిర్వహించారు.
ఈ తనిఖీల్లో మనీష్ దాబా, న్యూ రెడ్డి దాబాల్లో అక్రమంగా మద్యం సేవించేందుకు అనుమతించినట్లు పోలీసులు గుర్తించినట్లు తెలిపారు. దీంతో సంబంధిత దాబా యజమానులపై కేసులు నమోదు చేసినట్లు పోలీసులు వెల్లడించారు.
తూప్రాన్ సీఐ వెంకట రాజాగౌడ్ ఆధ్వర్యంలో ఎస్ఐ గంగరాజు, పోలీసు సిబ్బంది ఈ తనిఖీలు నిర్వహించారు. దాబాలు, హోటళ్లలో నిబంధనలకు విరుద్ధంగా మద్యం సేవించేందుకు అనుమతించడం చట్టవిరుద్ధమని పోలీసులు స్పష్టం చేశారు.
హైవే పక్కన ఉన్న దాబాల్లో అక్రమంగా మద్యం సేవించేందుకు అవకాశం కల్పించడం వల్ల శాంతిభద్రతలకు విఘాతం కలగడంతో పాటు మద్యం సేవించి వాహనాలు నడపడం ద్వారా రోడ్డు ప్రమాదాల ప్రమాదం కూడా పెరుగుతుందని పోలీసులు తెలిపారు.
ఎన్హెచ్–44పై ఉన్న అన్ని దాబాలు, హోటళ్ల యజమానులు నిబంధనలను తప్పనిసరిగా పాటించాలని హెచ్చరించారు. తమ దాబాలు, హోటళ్లలో అక్రమంగా మద్యం సేవించేందుకు ఎట్టి పరిస్థితుల్లోనూ అనుమతించరాదని సూచించారు.
నిబంధనలు ఉల్లంఘిస్తూ మద్యం సేవించేందుకు అవకాశం కల్పించినట్లు తనిఖీల్లో తేలితే సంబంధిత యజమానులు, నిర్వాహకులపై చట్టపరమైన చర్యలు తీసుకుని కేసులు నమోదు చేస్తామని పోలీసులు హెచ్చరించారు.
హైవేపై దాబాల నిర్వహణలో అన్ని నిబంధనలు పాటించాలని, పోలీసుల తనిఖీలకు యజమానులు, నిర్వాహకులు సహకరించాలని తూప్రాన్ పోలీసులు సూచించారు.
