గుత్తి: 37వ రోడ్డు భద్రతా మాసోత్సవాలలో భాగంగా ఈరోజు గుత్తి పట్టణంలో రోడ్డు సేఫ్టీ మిషన్ కార్యక్రమాన్ని గుత్తి అర్బన్ సీఐ రామారావు ఆధ్వర్యంలో నిర్వహించారు. ఈ సందర్భంగా ఆయన మాట్లాడుతూ రోడ్డు సేఫ్టీ మిషన్ యొక్క ముఖ్య ఉద్దేశ్యాలను ప్రజలకు వివరించారు.
రోడ్డు ప్రమాదాలను తగ్గించడం, ప్రజల్లో రోడ్డు భద్రతపై అవగాహన పెంపొందించడం రోడ్డు సేఫ్టీ మిషన్ యొక్క ప్రధాన లక్ష్యమని తెలిపారు. సంక్షిప్తంగా చెప్పాలంటే రోడ్డు ప్రమాదాల వల్ల జరిగే మరణాలు, గాయాలను తగ్గించడమే ఈ మిషన్ యొక్క ముఖ్య ఉద్దేశమని అన్నారు. అలాగే ట్రాఫిక్ నిబంధనలను కచ్చితంగా పాటించేలా ప్రజలను ప్రోత్సహించడం, సురక్షిత ప్రయాణ సంస్కృతిని పెంపొందించడమే లక్ష్యంగా పని చేస్తున్నామని పేర్కొన్నారు.
హెల్మెట్, సీట్ బెల్ట్ వినియోగంపై కఠిన చర్యలు తీసుకుంటామని, మద్యం సేవించి వాహనం నడిపే వారిపై (డ్రింక్ అండ్ డ్రైవ్) కఠిన నియంత్రణ ఉంటుందని తెలిపారు. ఓవర్లోడింగ్ పై చర్యలు తీసుకోవడంతో పాటు రోడ్డు మౌలిక సదుపాయాల మెరుగుదలకు కృషి చేస్తున్నామని అన్నారు.
ప్రమాదకర మలుపులు, బ్లాక్ స్పాట్స్ వద్ద వాహనదారులను అప్రమత్తం చేసేలా చర్యలు చేపడుతున్నామని, సైన్ బోర్డులు, జీబ్రా క్రాసింగ్స్, స్పీడ్ బ్రేకర్లు ఏర్పాటు చేస్తున్నామని వివరించారు. అలాగే ప్రమాదం జరిగిన వెంటనే అంబులెన్స్ సేవలు వేగంగా అందేలా చూడటం, గాయపడిన వారికి తక్షణ వైద్య సహాయం అందించడం కూడా రోడ్డు సేఫ్టీ మిషన్ యొక్క ముఖ్య లక్ష్యాలలో ఒకటని తెలిపారు.
ఒక్క ప్రమాదం కూడా జరగకుండా, ప్రతి ప్రయాణం సురక్షితంగా ఉండాలన్నదే రోడ్డు సేఫ్టీ మిషన్ యొక్క తుది ఆశయమని సీఐ రామారావు స్పష్టం చేశారు.
ఈ కార్యక్రమంలో గుత్తి ఎస్ఐలు సురేష్, అమీర్ ఖాన్, నాగప్పతో పాటు పోలీసు సిబ్బంది అజాద్, నాగరాజు, భాషా, సురేంద్ర పాల్గొన్నారు.
