- డిప్యూటీ సీఎం పవన్ కళ్యాణ్ ప్రశంసలు
మంగళగిరిలోని జనసేన పార్టీ రాష్ట్ర కార్యాలయంలో నిర్వహించిన నాయకులు, కార్యకర్తల సమావేశంలో ఆంధ్రప్రదేశ్ ఉప ముఖ్యమంత్రి కొణిదెల పవన్ కళ్యాణ్ ఆసక్తికర వ్యాఖ్యలు చేశారు. సేవా కార్యక్రమాలపై ప్రత్యేక దృష్టి సారించిన ఆయన, చిలకలూరిపేటకు చెందిన యువ సేవాకర్త మండలనేని చరణ్ తేజను ప్రశంసలతో ముంచెత్తారు.
పవన్ కళ్యాణ్ మాట్లాడుతూ, “చరణ్ పెద్దగా ఎక్కడా కనిపించడు. ప్రచారానికి ఎప్పుడూ దూరంగా ఉంటాడు. సేవే అతని లక్ష్యం. గతంలో చిలకలూరిపేటలోని శారద హై స్కూల్ అభివృద్ధికి సంబంధించి నేను ఒక మాట ఇచ్చాను. అయితే, నేను ఆ పనులు ప్రారంభించేలోపే, నాకు తెలియజేసి ఆ పనిని వేగవంతం చేసి, ఎలాంటి ఆశలు పెట్టుకోకుండా చరణ్ తేజ ఆ స్కూల్ అభివృద్ధి పనులను అత్యద్భుతంగా పూర్తి చేశాడు,” అని కొనియాడారు.
సేవా దృక్పథం, నిబద్ధత, నిరాడంబర స్వభావం కలిగిన యువత సమాజానికి ఆదర్శంగా నిలవాలని ఆయన పేర్కొన్నారు. పదవులు, ప్రచారం కోసం కాకుండా సమాజ హితాన్ని దృష్టిలో పెట్టుకుని పనిచేసే వ్యక్తులు రాజకీయాల్లో అవసరమని పవన్ కళ్యాణ్ అభిప్రాయపడ్డారు.
చిలకలూరిపేట శారద హై స్కూల్ అభివృద్ధి కార్యక్రమం స్థానికంగా మంచి స్పందన పొందిందని, విద్యార్థులకు మెరుగైన వసతులు అందించడంలో చరణ్ తేజ పాత్ర విశేషమని సమావేశంలో పలువురు నాయకులు అభినందించారు.
సేవా భావంతో ముందుకు సాగే యువతే రాష్ట్ర భవిష్యత్తని పేర్కొంటూ, అలాంటి వారిని ప్రోత్సహించడం తమ బాధ్యత అని ఉప ముఖ్యమంత్రి స్పష్టం చేశారు.
