న్యూఢిల్లీ/విశాఖపట్నం : విశాఖపట్నం స్టీల్ ప్లాంట్లో జరిగిన ఘోర ప్రమాదంపై ప్రధానమంత్రి నరేంద్ర మోదీ తీవ్ర దిగ్భ్రాంతి, విచారం వ్యక్తం చేశారు. ఈ దుర్ఘటన తనను తీవ్రంగా కలచివేసిందని పేర్కొంటూ, ప్రమాదంలో ప్రాణాలు కోల్పోయిన కార్మికుల కుటుంబాలకు ప్రగాఢ సానుభూతి తెలిపారు.
ఈ మేరకు ప్రధాని మోదీ స్పందిస్తూ, మృతుల కుటుంబాలకు ప్రధానమంత్రి జాతీయ సహాయ నిధి (PMNRF) నుంచి రూ.2 లక్షల చొప్పున ఎక్స్గ్రేషియా మంజూరు చేస్తున్నట్లు ప్రకటించారు. అలాగే ప్రమాదంలో గాయపడిన వారికి రూ.50 వేల చొప్పున ఆర్థిక సహాయం అందజేయనున్నట్లు తెలిపారు.
క్షతగాత్రులు త్వరగా కోలుకోవాలని ఆకాంక్షించిన ప్రధాని, బాధిత కుటుంబాలకు ప్రభుత్వం అన్ని విధాలుగా అండగా ఉంటుందని భరోసా ఇచ్చారు. స్థానిక అధికారులు బాధితులకు అవసరమైన సహాయ సహకారాలు అందిస్తున్నారని కూడా పేర్కొన్నారు.
కాగా, సోమవారం సాయంత్రం విశాఖ స్టీల్ ప్లాంట్లో వేడి ఉక్కు ద్రవంతో నిండిన ల్యాడిల్ విస్ఫోటనం చెందడంతో ఘోర ప్రమాదం చోటుచేసుకుంది. ఈ ప్రమాదంలో తొమ్మిది మంది కార్మికులు మృతి చెందగా, పలువురు గాయపడినట్లు సమాచారం. ప్రమాద ఘటనపై అధికారులు దర్యాప్తు ప్రారంభించారు.
ఈ విషాద ఘటన పట్ల వివిధ వర్గాల ప్రజలు, కార్మిక సంఘాలు తీవ్ర ఆవేదన వ్యక్తం చేస్తున్నాయి. మృతుల కుటుంబాలకు తక్షణ సహాయం అందించి, ప్రమాదానికి గల కారణాలను వెలికి తీసి భవిష్యత్తులో ఇలాంటి ఘటనలు పునరావృతం కాకుండా చర్యలు తీసుకోవాలని డిమాండ్ చేస్తున్నారు.
