- కాగితాలకే పరిమితమైన ధర్మవరం–పాకాల–కాట్పాడి ప్రాజెక్టులు
పాకాల : రైల్వే బడ్జెట్లో రాయలసీమ ప్రాంత అభివృద్ధికి వేల కోట్ల రూపాయలు కేటాయిస్తున్నట్లు ప్రకటనలు వస్తున్నప్పటికీ, ధర్మవరం–పాకాల–కాట్పాడి రైల్వే మార్గానికి సంబంధించిన కీలక పనులు మాత్రం ఆశించిన స్థాయిలో ముందుకు సాగడం లేదని స్థానిక ప్రజలు, రైల్వే ప్రయాణికులు అసంతృప్తి వ్యక్తం చేస్తున్నారు. బడ్జెట్లో భారీగా నిధులు కేటాయించినట్లు చెబుతున్నా, క్షేత్రస్థాయిలో పనుల పురోగతి కనిపించడం లేదని వారు ఆవేదన వ్యక్తం చేస్తున్నారు.
రూ.2,900 కోట్ల డబ్లింగ్.. రూ.239.15 కోట్ల విద్యుదీకరణ
ధర్మవరం–పాకాల–కాట్పాడి మార్గంలో రెండో రైల్వే లైన్ (డబ్లింగ్) నిర్మాణానికి రూ.2,900 కోట్లు కేటాయించినట్లు పేర్కొంటున్నారు. అలాగే ధర్మవరం–పాకాల మార్గ విద్యుదీకరణ పనులకు రూ.239.15 కోట్లు కేటాయించినట్లు ప్రకటించారు. రాయలసీమ రైల్వే అభివృద్ధికి మొత్తం రూ.13,878.29 కోట్ల మేర నిధులు కేటాయించినట్లు ప్రచారం జరుగుతున్నప్పటికీ, ప్రధాన ప్రాజెక్టుల పనులు మాత్రం వేగం పుంజుకోకపోవడం పట్ల ప్రజల్లో ప్రశ్నలు తలెత్తుతున్నాయి.
భూసేకరణలో జాప్యం.. పనులపై కనిపించని కదలిక
డబ్లింగ్ పనులకు అవసరమైన భూసేకరణ ప్రక్రియలో జాప్యం కొనసాగుతోందని స్థానికులు చెబుతున్నారు. విద్యుదీకరణ, రెండో లైన్ నిర్మాణానికి సంబంధించిన పనులు వేగవంతం కాకపోవడంతో బడ్జెట్ కేటాయింపులు కాగితాలకే పరిమితమవుతున్నాయనే విమర్శలు వినిపిస్తున్నాయి. నిధులు కేటాయించిన వెంటనే పనులు ప్రారంభించి నిర్ణీత కాలవ్యవధిలో పూర్తి చేయాల్సిన అవసరం ఉందని ప్రయాణికులు పేర్కొంటున్నారు.
ప్రజా ప్రతినిధులు చొరవ చూపాలి
ధర్మవరం–పాకాల–కాట్పాడి రైల్వే మార్గం రాయలసీమ ప్రాంతానికి కీలకమైన రవాణా మార్గమని, డబ్లింగ్, విద్యుదీకరణ పూర్తయితే రైళ్ల రాకపోకలు మరింత సులభతరం కావడంతో పాటు ప్రయాణ సమయం తగ్గే అవకాశం ఉంటుందని ప్రజలు చెబుతున్నారు. సంబంధిత అధికారులు భూసేకరణ ప్రక్రియను వేగవంతం చేసి, పెండింగ్ పనులను త్వరితగతిన ప్రారంభించేలా ప్రజా ప్రతినిధులు కేంద్ర రైల్వే శాఖ దృష్టికి తీసుకెళ్లాలని స్థానికులు, రైల్వే ప్రయాణికులు కోరుతున్నారు.
