చిత్తూరు జిల్లా చౌడేపల్లి మండలం బోయకొండ అటవీ ప్రాంతంలో జరిగిన తమిళనాడు వాసి గాంధీ హత్య కేసులో కీలక విషయాలు వెలుగులోకి వచ్చాయి. ఈ హత్యకు వివాహేతర సంబంధమే ప్రధాన కారణమని పోలీసులు వెల్లడించారు.
ఇటీవల బోయకొండ అటవీ ప్రాంతంలో అనుమానాస్పద పరిస్థితుల్లో గాంధీ మృతదేహం లభించగా, ఈ ఘటనపై మృతుడి తమ్ముడు చంద్రశేఖర్ ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు. విచారణలో హత్య వెనుక వ్యక్తిగత విభేదాలు, ముఖ్యంగా వివాహేతర సంబంధం కారణమని పోలీసులు నిర్ధారించారు.
ఈ కేసులో మృతుడి భార్యతో పాటు మరో ముగ్గురిని పోలీసులు అదుపులోకి తీసుకున్నారు. దేవరకొండ నరసింహులు (A1), దేవరకొండ లక్ష్మీపతి (A2), రాసాతి (A3), దేవరకొండ నాగరాజు (A4)లపై కేసు నమోదు చేశారు.
ఈ విషయంపై సిఐ సాయి ప్రసాద్ మాట్లాడుతూ, “వివాహేతర సంబంధాల నేపథ్యంలో వ్యక్తిగత విభేదాలు పెరిగి ఈ హత్య జరిగినట్లు దర్యాప్తులో వెల్లడైంది. నిందితులను అరెస్ట్ చేసి రిమాండ్కు తరలించాం” అని తెలిపారు.
పోలీసులు నిందితులను అరెస్ట్ చేసి కోర్టులో హాజరుపరచగా, న్యాయస్థానం రిమాండ్ విధించింది. ఈ ఘటన స్థానికంగా కలకలం రేపింది.
