విశాఖపట్నం : విశాఖపట్నంలోని అత్యంత రద్దీ ప్రాంతమైన కొత్త గాజువాక మార్కెట్ రోడ్డులో గురువారం భారీ అగ్నిప్రమాదం సంభవించింది. అక్కడ ఉన్న ‘శివ ఫైర్వర్క్స్’ టపాసుల దుకాణంలో ఒక్కసారిగా మంటలు చెలరేగడంతో స్థానికులు, వ్యాపారులు తీవ్ర భయాందోళనలకు గురయ్యారు. భారీగా మంటలు ఎగసిపడటంతో పాటు దట్టమైన పొగ వ్యాపించి మార్కెట్ ప్రాంతమంతా కలకలం రేగింది.
అగ్నిప్రమాదాన్ని గమనించిన స్థానికులు వెంటనే అగ్నిమాపక శాఖకు సమాచారం అందించారు. ఘటనాస్థలికి చేరుకున్న ఫైర్ సిబ్బంది మంటలను అదుపులోకి తెచ్చేందుకు తీవ్రంగా శ్రమించారు. టపాసుల నిల్వలు ఉండటంతో మంటలు వేగంగా వ్యాపించాయని ప్రత్యక్ష సాక్షులు తెలిపారు.
ఈ ప్రమాదం కారణంగా కొత్త గాజువాక మార్కెట్ ప్రధాన రహదారిపై భారీగా ట్రాఫిక్ స్తంభించింది. వాహనాలు ఎక్కడికక్కడ నిలిచిపోవడంతో ప్రయాణికులు తీవ్ర ఇబ్బందులు ఎదుర్కొన్నారు. సమాచారం అందుకున్న పోలీసులు వెంటనే రంగంలోకి దిగి ట్రాఫిక్ను మళ్లించి పరిస్థితిని అదుపులోకి తీసుకువచ్చారు.
ఈ ఘటనపై విశాఖ సౌత్ ఏసీపీ శ్రీనివాస్ స్పందిస్తూ కీలక విషయాలను వెల్లడించారు. ప్రమాదానికి గురైన ‘శివ ఫైర్వర్క్స్’ దుకాణానికి పోలీస్ శాఖ నుంచి ఎలాంటి అనుమతులు లేవని ఆయన స్పష్టం చేశారు. పోలీసులు అనుమతి నిరాకరించినప్పటికీ, దుకాణ యజమాని కోర్టును ఆశ్రయించి అనుమతి ఉత్తర్వులు తెచ్చుకుని వ్యాపారం నిర్వహిస్తున్నట్లు తెలిపారు.
జనావాసాలు అధికంగా ఉండే ప్రాంతాలు, వ్యాపార కూడళ్ల వద్ద పేలుడు పదార్థాలు, బాణసంచా విక్రయించడం భద్రతాపరంగా ప్రమాదకరమని ఏసీపీ పేర్కొన్నారు. ప్రజల ప్రాణాలకు ముప్పు కలిగించే విధంగా నిబంధనలకు విరుద్ధంగా వ్యవహరించిన వారిపై కఠిన చర్యలు తీసుకుంటామని హెచ్చరించారు.
కోర్టు అనుమతులు ఉన్నప్పటికీ ప్రజా భద్రతకు విఘాతం కలిగించే అంశాలపై చట్టపరమైన చర్యలు తప్పవని స్పష్టం చేశారు. ప్రమాదానికి గల ఖచ్చితమైన కారణాలను గుర్తించేందుకు అధికారులు దర్యాప్తు చేపట్టారు. ఈ ఘటనలో ఎవరైనా గాయపడ్డారా, ఎంత మేర ఆస్తి నష్టం సంభవించిందనే వివరాలు ఇంకా వెల్లడికాలేదు.
రద్దీ ప్రాంతంలో జరిగిన ఈ అగ్నిప్రమాదం స్థానిక ప్రజల్లో ఆందోళన రేకెత్తించగా, భవిష్యత్తులో ఇలాంటి ప్రమాదాలు జరగకుండా కట్టుదిట్టమైన చర్యలు తీసుకోవాలని స్థానికులు కోరుతున్నారు.
