జిల్లా కేంద్రానికి స్మార్ట్ విజన్ కరువైంది : పౌర సంక్షేమ సంఘం

కాకినాడ : కాకినాడ నగర అభివృద్ధి పూర్తిగా నిలిచిపోయిందని, రూ.360 కోట్ల సాధారణ బడ్జెట్‌తో నడిచే కాకినాడ మున్సిపల్ కార్పొరేషన్‌కు సీనియర్ ఐఏఎస్ అధికారిని కమిషనర్‌గా నియమించాలని పౌర సంక్షేమ సంఘం కన్వీనర్, సామాజికవేత్త దూసర్లపూడి రమణరాజు ప్రభుత్వాన్ని డిమాండ్ చేశారు.

మంగళవారం విడుదల చేసిన ప్రకటనలో ఆయన మాట్లాడుతూ, కాకినాడకు సిటీ, రూరల్ ఎమ్మెల్యేలు, ఎంపీ, రాజ్యసభ సభ్యుడు, ఎమ్మెల్సీలు వంటి ఆరుగురు ప్రజాప్రతినిధులు ఉన్నప్పటికీ నగరానికి సమర్థవంతమైన పరిపాలన కల్పించేందుకు ప్రభుత్వంపై ఒత్తిడి తీసుకురాకపోవడం విచారకరమని అన్నారు. ప్రస్తుతం నాలుగు ప్రభుత్వ శాఖలకు ఉమ్మడిగా బాధ్యతలు నిర్వహిస్తున్న, పదవీ విరమణ గడువు పొడిగింపుతో కొనసాగుతున్న అధికారిని కార్పొరేషన్ కమిషనర్‌గా కొనసాగించడం నగరాభివృద్ధికి ప్రతికూలంగా మారిందని విమర్శించారు.

స్ట్రీట్ ఫుడ్ హబ్ ప్రాజెక్టు నిలిచిపోయిందని ఆరోపణ

కేంద్ర గృహ నిర్మాణ, పట్టణ వ్యవహారాల మంత్రిత్వ శాఖ ఆధ్వర్యంలోని “స్ట్రీట్ ఫుడ్ హబ్” పథకం కింద ఆంధ్రప్రదేశ్ నుంచి తొలిసారిగా కాకినాడ ఎంపికై రూ.4 కోట్ల నిధులు మంజూరైనా, ఇప్పటి వరకు పనుల్లో ఎలాంటి పురోగతి లేదని పేర్కొన్నారు. అంతేకాకుండా వార్ఫ్ రోడ్ ఉప్పుటేరు కాలువ గట్ల వద్ద డెబ్రిస్ డంపింగ్, ఆక్రమణల కారణంగా మురుగునీటి ప్రవాహం అడ్డంకులు ఎదుర్కొంటోందని, వరదలు సంభవిస్తే 25 డివిజన్లు నీట మునిగే ప్రమాదం ఉందని హెచ్చరించారు. అలాంటి ప్రాంతంలో ఫుడ్ హబ్ ఏర్పాటు ప్రతిపాదించడం సరికాదని అభిప్రాయపడ్డారు.

ఆర్థిక నిర్వహణలో వైఫల్యాలపై విమర్శలు

కార్పొరేషన్ 18 ప్రభుత్వ శాఖల నుంచి వసూలు చేయాల్సిన సుమారు రూ.48 కోట్ల ఆస్తి పన్నును ఇప్పటికీ రాబట్టలేకపోయిందని, అలాగే ప్రజలు చెల్లించిన సాధారణ నిధుల్లో 14 ప్రభుత్వ శాఖలు వినియోగించిన రూ.36 కోట్లను కూడా తిరిగి తీసుకురావడంలో విఫలమైందని ఆరోపించారు.

పీఆర్ కళాశాల సమీపంలోని డే అండ్ నైట్ ఈట్ స్ట్రీట్ కోసం గతంలో స్మార్ట్ సిటీ నిధులతో కోట్ల రూపాయలు ఖర్చు చేసినప్పటికీ, ఆశించిన ప్రయోజనం లేకుండా దళారులకే ఉపయోగపడుతోందని విమర్శించారు.

మున్సిపల్ నిధుల వినియోగంపై అభ్యంతరం

ప్రభుత్వ వైద్యశాఖ నిధులతో చేపట్టాల్సిన జీజీహెచ్ అంతర్గత రోడ్ల నిర్మాణాన్ని మున్సిపల్ నిధులతో చేపట్టేందుకు ప్రతిపాదనలు సిద్ధం చేయడం స్థానిక సంస్థ ఆర్థిక పరిస్థితిని మరింత దెబ్బతీసే చర్య అని రమణరాజు పేర్కొన్నారు.

అవినీతి, ఆదాయ నష్టాలపై ఆరోపణలు

నగరంలో హోర్డింగ్‌ల ద్వారా ప్రతి సంవత్సరం రూ.50 లక్షల ఆదాయం కోల్పోతున్నారని, సిటీ ప్లానింగ్ విభాగంలో అక్రమ భవనాల వ్యవహారాల్లో భారీగా అక్రమాలు జరుగుతున్నాయని ఆరోపించారు. జనన, మరణ ధ్రువీకరణ పత్రాలు, కొత్త పన్నుల విధింపు వంటి సేవలు కూడా దళారుల ప్రమేయం లేకుండా పొందడం కష్టంగా మారిందని విమర్శించారు.

హెల్త్ విభాగంలో ఫుడ్ తనిఖీల పేరిట అవినీతి జరుగుతోందని, గ్రీవెన్స్ దరఖాస్తుల పరిష్కారం నుంచి వీధి దీపాల మరమ్మతుల వరకు రాజకీయ జోక్యం లేకుండా ఏ పని జరగడం లేదని ఆరోపించారు.

ప్రభుత్వం ప్రత్యేక దృష్టి సారించాలని విజ్ఞప్తి

ముఖ్యమంత్రి, ఉప ముఖ్యమంత్రి, మున్సిపల్ శాఖ మంత్రి, జిల్లా కలెక్టర్, ప్రజాప్రతినిధులు కాకినాడ అభివృద్ధిపై ప్రత్యేక దృష్టి సారించాలని రమణరాజు కోరారు. నగరాభివృద్ధి, ఆదాయ వృద్ధి, పారదర్శక పరిపాలన కోసం వెంటనే సీనియర్ ఐఏఎస్ అధికారిని కమిషనర్‌గా నియమించాలని డిమాండ్ చేశారు.

ప్రభుత్వం ఇప్పటికైనా స్పందించి నగర సమస్యల పరిష్కారానికి చర్యలు చేపట్టకపోతే, వచ్చే ఏడాది జరగనున్న కాకినాడ మున్సిపల్ కార్పొరేషన్ ఎన్నికల్లో ప్రజలు తమ అసంతృప్తిని ఓటు రూపంలో వ్యక్తం చేసే అవకాశం ఉందని ఆయన హెచ్చరించారు.

గమనిక: ఈ కథనంలో పేర్కొన్న ఆరోపణలు పౌర సంక్షేమ సంఘం కన్వీనర్ దూసర్లపూడి రమణరాజు చేసిన ప్రకటన ఆధారంగా ప్రచురించబడుతున్నాయి. సంబంధిత అధికారుల స్పందన అందిన వెంటనే ప్రచురించబడుతుంది.