కొమరం భీం ఆసిఫాబాద్ జిల్లా, చింతలమనేపల్లి: చింతలమనేపల్లి మండల కేంద్రంలో నూతనంగా నిర్మించిన ‘నక్షత్ర మండల సమాఖ్య’ భవనాన్ని ఉమ్మడి ఆదిలాబాద్ జిల్లా ఎమ్మెల్సీ దండే విఠల్ ఘనంగా ప్రారంభించారు. ఈ సందర్భంగా నిర్వహించిన కార్యక్రమంలో ఆయన మాట్లాడుతూ, రాష్ట్ర ప్రభుత్వం ఇందిరాకాంతి పథం ద్వారా మహిళల ఆర్థిక స్వావలంబనకు విశేష ప్రాధాన్యం ఇస్తోందని తెలిపారు. మహిళలను ఆర్థికంగా బలోపేతం చేసి కోటీశ్వరులుగా తీర్చిదిద్దడమే ప్రభుత్వ ప్రధాన లక్ష్యమని పేర్కొన్నారు.
మహిళా సంఘాలకు ప్రభుత్వం అందిస్తున్న వడ్డీలేని రుణాలు, నైపుణ్యాభివృద్ధి శిక్షణ కార్యక్రమాలను సద్వినియోగం చేసుకొని స్వయం ఉపాధి అవకాశాలను పెంపొందించుకోవాలని మహిళలకు ఎమ్మెల్సీ సూచించారు. నూతనంగా ప్రారంభించిన ‘నక్షత్ర మండల సమాఖ్య’ భవనం ఇకపై మండలంలోని మహిళా సంఘాల సమావేశాలు, శిక్షణ కార్యక్రమాలు, పరిపాలనా కార్యకలాపాలకు ప్రధాన కేంద్రంగా ఉపయోగపడుతుందని ఆయన తెలిపారు.
ఈ కార్యక్రమంలో స్థానిక ప్రజాప్రతినిధులు, వివిధ శాఖల అధికారులు, మహిళా సంఘాల సభ్యులు, గ్రామస్తులు పెద్ద సంఖ్యలో పాల్గొని భవన ప్రారంభోత్సవాన్ని విజయవంతం చేశారు.
