అమరావతి: ఆంధ్రప్రదేశ్లో కొత్త పింఛన్ల కోసం ఎదురుచూస్తున్న వితంతు మహిళలకు రాష్ట్ర ప్రభుత్వం శుభవార్త తెలిపింది. రాష్ట్రవ్యాప్తంగా కొత్తగా 2.20 లక్షల మంది అర్హులైన వితంతువులకు పింఛన్లు మంజూరు చేయనున్నట్లు రాష్ట్ర మంత్రి కొండపల్లి శ్రీనివాస్ ప్రకటించారు. రాబోయే ఒకటి నుంచి రెండు నెలల్లో ఈ పింఛన్ల అమలుకు సంబంధించిన మార్గదర్శకాలను సిద్ధం చేసి, ప్రతి నెలా రూ.4 వేల చొప్పున పింఛను అందించేలా చర్యలు తీసుకుంటున్నట్లు వెల్లడించారు.
ప్రస్తుతం రాష్ట్రంలో 62.34 లక్షల మందికి వివిధ సామాజిక భద్రతా పింఛన్లు అందిస్తున్నామని మంత్రి తెలిపారు. ఈ పథకాల అమలుకు రాష్ట్ర ప్రభుత్వం ఏటా సుమారు రూ.33 వేల కోట్లు వెచ్చిస్తోందని చెప్పారు. దేశంలో అత్యధిక సంఖ్యలో సామాజిక భద్రతా పింఛన్లు అందిస్తున్న రాష్ట్రంగా ఆంధ్రప్రదేశ్ నిలిచిందని పేర్కొన్నారు.
పింఛను పొందుతున్న భర్త మరణించిన సందర్భాల్లో, అతని భార్యకు వెంటనే ‘స్పౌజ్ కేటగిరీ’ కింద పింఛన్ బదిలీ చేసే విధానాన్ని ప్రభుత్వం అమలు చేస్తోందని మంత్రి వివరించారు. ఈ విధానం ద్వారా ఇప్పటివరకు 2.45 లక్షల మందికి ప్రయోజనం చేకూరిందన్నారు.
పింఛన్ల తొలగింపుపై ప్రతిపక్షాలు చేస్తున్న ఆరోపణలను మంత్రి ఖండించారు. గత వైసీపీ ప్రభుత్వం 9.56 లక్షల పింఛన్లను తొలగించిందని, అయితే ప్రస్తుత ప్రభుత్వం నిబంధనల ప్రకారం అనర్హులుగా గుర్తించిన కేవలం 7,856 మంది పింఛన్లను మాత్రమే రద్దు చేసిందని తెలిపారు.
దివ్యాంగులు, దీర్ఘకాలిక రోగులతో బాధపడుతున్న వారి పింఛన్లను ప్రభుత్వం ఎక్కడా తొలగించలేదని స్పష్టం చేశారు. అర్హులైన ప్రతి ఒక్కరికీ సంక్షేమ పథకాల ప్రయోజనాలు అందేలా ప్రభుత్వం కట్టుబడి పనిచేస్తోందని మంత్రి కొండపల్లి శ్రీనివాస్ పేర్కొన్నారు.
కొత్త వితంతు పింఛన్ల మంజూరుతో రాష్ట్రంలోని వేలాది కుటుంబాలకు ఆర్థిక భరోసా కలగనుందని, మహిళల సామాజిక భద్రత మరింత బలోపేతం కానుందని ప్రభుత్వం భావిస్తోంది.
