తిరుపతి : పేద ప్రజలకు నాణ్యమైన వైద్య సేవలు అందించాలనే లక్ష్యంతో ఏర్పాటైన బర్డ్ ఆసుపత్రిలో పలు అక్రమాలు, అవకతవకలు జరుగుతున్నాయంటూ కొందరు బాధితులు తీవ్ర ఆరోపణలు చేశారు. ఆసుపత్రి యాజమాన్యం, కొందరు అధికారుల నిర్లక్ష్యం కారణంగా రోగులు ఇబ్బందులు ఎదుర్కొంటున్నారని వారు పేర్కొన్నారు. ఈ వ్యవహారాలపై వెంటనే ఉన్నత స్థాయి విచారణ జరిపించాలని డిమాండ్ చేశారు.
బాధితుల ఆరోపణల ప్రకారం, ఆసుపత్రిలో వైద్య సేవల నిర్వహణలో తీవ్ర లోపాలు చోటుచేసుకుంటున్నాయని తెలిపారు. శస్త్రచికిత్సల విషయంలో పొరపాట్లు జరుగుతున్నాయని, వాటికి బాధ్యులైన వారిపై చర్యలు తీసుకోవాల్సిన స్థానంలో నర్సింగ్ సిబ్బందిపై క్రమశిక్షణ చర్యలు చేపడుతున్నారని ఆరోపించారు.
అలాగే గతంలో రోగులకు అందుబాటులో ఉండే ఉచిత మందులు, వైద్య సామగ్రి ప్రస్తుతం ఆసుపత్రిలో అందుబాటులో లేకపోవడంతో రోగులు బయట మెడికల్ షాపుల నుంచి కొనుగోలు చేయాల్సిన పరిస్థితి ఏర్పడిందని బాధితులు వాపోయారు. ఆరోగ్యశ్రీ కింద చికిత్స పొందుతున్నప్పటికీ అదనపు ఖర్చులు భరించాల్సి వస్తోందని పేర్కొన్నారు.
సర్జరీల కోసం ఉపయోగించే ఇంప్లాంట్ల కొనుగోళ్లలో కూడా పారదర్శకత లోపించిందని బాధితులు ఆరోపించారు. గతంలో పలు కంపెనీల నుంచి సామగ్రి సేకరించగా, ప్రస్తుతం ఒకే కంపెనీకి ప్రాధాన్యత ఇస్తున్నారని, దీనివల్ల కమిషన్ల వ్యవహారం నడుస్తోందన్న అనుమానాలు వ్యక్తం చేశారు.
ఆసుపత్రిలో కొందరు శాశ్వత ఉద్యోగులు విధులకు సక్రమంగా హాజరు కాకపోయినా అధికారులు పట్టించుకోవడం లేదని, ఆసుపత్రి సిబ్బందిని వ్యక్తిగత పనులకు వినియోగిస్తున్నారంటూ కూడా ఆరోపణలు వినిపించాయి. ప్రభుత్వ నిధులతో జీతాలు పొందుతూ విధి నిర్వహణలో నిర్లక్ష్యం ప్రదర్శిస్తున్న వారిపై చర్యలు తీసుకోవాలని బాధితులు కోరారు.
ఇక ఎస్సీ, ఎస్టీ వర్గాలకు చెందిన ఉద్యోగులతో పాటు దిగువ స్థాయి సిబ్బందిపై వేధింపులు జరుగుతున్నాయని, విధి సమయాల విషయంలో నిబంధనలకు విరుద్ధంగా వ్యవహరిస్తున్నారని కొందరు ఉద్యోగులు ఆరోపించారు. తమ సమస్యలను ప్రస్తావించిన ఉద్యోగులపై ప్రతీకార చర్యలు తీసుకుంటున్నారని కూడా వారు పేర్కొన్నారు.
ఆసుపత్రిలో జరుగుతున్నట్లు ఆరోపణలు వస్తున్న ఈ వ్యవహారాలపై టిటిడి విజిలెన్స్ విభాగం, సంబంధిత ఉన్నతాధికారులు స్పందించి సమగ్ర విచారణ చేపట్టాలని బాధితులు డిమాండ్ చేశారు. ఆరోపణల్లో వాస్తవాలు ఉంటే బాధ్యులపై కఠిన చర్యలు తీసుకోవాలని కోరారు.
ఈ ఆరోపణలపై బర్డ్ ఆసుపత్రి యాజమాన్యం లేదా సంబంధిత అధికారులు స్పందించలేదు.
