పెద్దపల్లి : పెద్దపల్లి జిల్లాలో అవినీతి నిరోధక శాఖ (ఏసీబీ) అధికారులు నిర్వహించిన మెరుపుదాడిలో మున్సిపల్ అసిస్టెంట్ ఇంజనీర్ (ఏఈ) లంచం తీసుకుంటూ రెడ్హ్యాండెడ్గా పట్టుబడ్డారు. ఈ ఘటన జిల్లా వ్యాప్తంగా సంచలనంగా మారింది.
ఏసీబీ అధికారుల వివరాల ప్రకారం, పెద్దపల్లి మున్సిపల్ కార్యాలయంలో అసిస్టెంట్ ఇంజనీర్గా పనిచేస్తున్న సతీష్, మున్సిపల్ పరిధిలో చేపట్టిన అభివృద్ధి పనులకు సంబంధించిన బిల్లులను విడుదల చేయడానికి కాంట్రాక్టర్ బత్తుల శ్రీను నుంచి రూ.2 లక్షల లంచం డిమాండ్ చేశాడు. ఈ మేరకు ఫిర్యాదు అందుకున్న ఏసీబీ అధికారులు పక్కా ప్రణాళికతో మంగళవారం ఉచ్చుపన్ని, సతీష్ లంచం స్వీకరిస్తున్న సమయంలోనే రెడ్హ్యాండెడ్గా అదుపులోకి తీసుకున్నారు.
ముందుగా ఏఈ సతీష్ను ఆయన నివాసం వద్ద అదుపులోకి తీసుకున్న అధికారులు, అనంతరం విచారణ నిమిత్తం పెద్దపల్లి మున్సిపల్ కార్యాలయానికి తరలించారు. అక్కడ సంబంధిత రికార్డులు, బిల్లుల వివరాలను పరిశీలిస్తూ విచారణ కొనసాగిస్తున్నారు.
ఈ దాడుల్లో కరీంనగర్ ఏసీబీ డీఎస్పీ మహేందర్ రెడ్డి ఆధ్వర్యంలో ఇన్స్పెక్టర్లు, ఏసీబీ సిబ్బంది పాల్గొన్నారు. అవినీతికి పాల్పడే ప్రభుత్వ ఉద్యోగులపై కఠిన చర్యలు తప్పవని డీఎస్పీ మహేందర్ రెడ్డి హెచ్చరించారు.
ఈ ఘటనతో పెద్దపల్లి మున్సిపల్ కార్యాలయంలో కలకలం రేగగా, ప్రభుత్వ కార్యాలయాల్లో అవినీతిపై ఏసీబీ చర్యలు మరింత కఠినంగా కొనసాగనున్నాయనే సంకేతాలు వెలువడ్డాయి.
