కాగజ్నగర్ : సిర్పూర్ పేపర్ మిల్లులో కార్మికులకు ఫ్యాక్టరీల చట్టం ప్రకారం తక్షణమే క్యాంటీన్ మరియు ఇతర ప్రాథమిక సౌకర్యాలు కల్పించాలని సిఐటియు అనుబంధ సిర్పూర్ పేపర్ మిల్ మజ్దూర్ యూనియన్ డిమాండ్ చేసింది. ఈ మేరకు హైదరాబాద్లో రాష్ట్ర డైరెక్టర్ ఆఫ్ ఫ్యాక్టరీస్ వై. మోహన్ బాబుకు యూనియన్ ప్రతినిధులు వినతిపత్రం సమర్పించారు.
చట్ట ఉల్లంఘన ఆరోపణలు:
ఫ్యాక్టరీల చట్టం-1948 సెక్షన్ 46 ప్రకారం 250 మందికి పైగా కార్మికులు పనిచేస్తున్న సంస్థల్లో క్యాంటీన్ సౌకర్యం తప్పనిసరి. అయితే సుమారు 2,188 మంది కార్మికులు పనిచేస్తున్న సిర్పూర్ పేపర్ మిల్లులో గత 8 ఏళ్లుగా ఈ సౌకర్యం లేకపోవడం తీవ్ర అన్యాయమని యూనియన్ అధ్యక్షుడు జె. మల్లికార్జున్ తెలిపారు.
కార్మికుల ఇబ్బందులు:
2018లో జేకే యాజమాన్యం మిల్లును స్వాధీనం చేసుకున్న తర్వాత పూర్వం అమలులో ఉన్న వెల్ఫేర్ సౌకర్యాలు నిలిచిపోయాయని, దీంతో కార్మికులు తీవ్రమైన ఇబ్బందులు ఎదుర్కొంటున్నారని యూనియన్ నాయకులు ఆవేదన వ్యక్తం చేశారు.
తక్షణ చర్యల కోసం డిమాండ్:
ఫ్యాక్టరీస్ ఇన్స్పెక్టర్ ద్వారా వెంటనే విచారణ జరిపించి, కార్మికులకు సబ్సిడీతో కూడిన క్యాంటీన్ ఏర్పాటు చేయాలని యూనియన్ కోరింది. ఈ కార్యక్రమంలో యూనియన్ వర్కింగ్ ప్రెసిడెంట్ భూపాల్ తదితరులు పాల్గొన్నారు.
