మెట్పల్లి, జగిత్యాల జిల్లా: మద్యం మత్తులో ఓ వ్యక్తి నడిరోడ్డుపై హల్చల్ సృష్టించిన ఘటన జగిత్యాల జిల్లా మెట్పల్లి పట్టణంలో చోటుచేసుకుంది. బస్ డిపో సమీపంలో మద్యం సేవించిన వ్యక్తి రోడ్డుపైకి వచ్చి వాహనాలను అడ్డుకుంటూ హంగామా చేశాడు.
ఈ క్రమంలో అటుగా వెళ్తున్న ఆర్టీసీ బస్సును సైతం అడ్డుకున్నాడు. బస్సుపైకి ఎక్కి డ్రైవర్ను దూషిస్తూ దాడికి యత్నించినట్లు సమాచారం. అతడి ప్రవర్తనను తప్పుబట్టిన భార్యపై కూడా దాడికి పాల్పడినట్లు స్థానికులు తెలిపారు.
భర్తను వారించేందుకు ప్రయత్నించిన భార్యపై పిడిగుద్దులతో దాడి చేయడంతో అక్కడ ఉన్న వారు ఒక్కసారిగా ఆందోళనకు గురయ్యారు. అతడిని అడ్డుకునేందుకు ప్రయత్నించిన స్థానికులు, ఇతరులపై కూడా చేయి చేసుకునేందుకు ప్రయత్నించినట్లు తెలుస్తోంది.
రోడ్డుపై వ్యక్తి హల్చల్ చేయడంతో వాహనాల రాకపోకలకు కొంత అంతరాయం ఏర్పడింది. బస్సులో ఉన్న ప్రయాణికులు, స్థానికులు తీవ్ర భయాందోళనకు గురయ్యారు. కొద్దిసేపు అక్కడ ఉద్రిక్త పరిస్థితి నెలకొంది.
ఈ ఘటనకు సంబంధించిన పూర్తి వివరాలు తెలియాల్సి ఉంది. ఘటనపై పోలీసులు విచారణ జరిపి, బాధ్యుడిపై చర్యలు తీసుకోవాలని స్థానికులు కోరుతున్నారు.
