హైదరాబాద్ : దిల్‌సుఖ్‌నగర్‌లోని సంతోషీమాత ఆలయంలో అమ్మవారి విగ్రహంపై దాడి జరిగిన ఘటనపై బీజేపీ తీవ్రంగా స్పందించింది. ఘటన జరిగిన ఆలయాన్ని బీజేపీ రాష్ట్ర అధ్యక్షుడు ఎన్. రామచందర్‌రావు పార్టీ నాయకులు, కార్యకర్తలతో కలిసి సందర్శించారు. అమ్మవారిని దర్శించుకుని ప్రత్యేక పూజలు నిర్వహించారు.
వివరాల ప్రకారం.. ఓ వ్యక్తి ఆలయంలోకి ప్రవేశించి పూజారిపై దాడికి యత్నించడంతో పాటు అమ్మవారి విగ్రహంపై కర్రతో దాడి చేసినట్లు తెలుస్తోంది. ఈ ఘటన ఆలయంలోని సీసీటీవీ కెమెరాల్లో నమోదైనట్లు సమాచారం. ఘటనను గమనించిన భక్తులు సదరు వ్యక్తిని పట్టుకుని పోలీసులకు అప్పగించినట్లు తెలిసింది.
ఈ ఘటనపై రామచందర్‌రావు మాట్లాడుతూ ఆలయాల భద్రతపై ప్రభుత్వం ప్రత్యేక దృష్టి పెట్టాలని డిమాండ్ చేశారు. దేవాలయాల్లో ఇలాంటి ఘటనలు పునరావృతం కాకుండా కట్టుదిట్టమైన భద్రతా చర్యలు చేపట్టాలని కోరారు.
హైదరాబాద్‌లో గతంలోనూ ఆలయాలకు సంబంధించిన ఘటనలు చోటుచేసుకున్నాయని ఆయన పేర్కొన్నారు. ముత్యాలమ్మ ఆలయ ఘటనతో పాటు ఇటీవల జరిగిన ఇతర ఘటనలను ప్రస్తావిస్తూ.. దేవాలయాలపై దాడుల విషయంలో పోలీసులు, ప్రభుత్వం కఠినంగా వ్యవహరించాల్సిన అవసరం ఉందన్నారు.
అలాగే, ఇలాంటి ఘటనలపై నిందితుల మానసిక పరిస్థితిని మాత్రమే కారణంగా చూపకుండా, ఘటనకు దారితీసిన అసలు కారణాలను అన్ని కోణాల్లో దర్యాప్తు చేయాలని రామచందర్‌రావు కోరారు. ఆలయాల వద్ద భద్రతను పెంచడంతో పాటు సీసీటీవీ నిఘాను మరింత బలోపేతం చేయాలని డిమాండ్ చేశారు.
కాగా, ఈ ఘటనకు సంబంధించిన పూర్తి వివరాలు, నిందితుడి ఉద్దేశం, ఘటన వెనుక కారణాలపై పోలీసుల దర్యాప్తు కొనసాగుతోంది.
