కరీంనగర్ జిల్లా: నగరంలో శాంతిభద్రతల పరిరక్షణతో పాటు నేరాల నియంత్రణ లక్ష్యంగా బుధవారం కరీంనగర్ నగర పోలీస్ కమిషనర్ గౌష్ ఆలం ఆధ్వర్యంలో విస్తృత స్థాయి ఆకస్మిక తనిఖీలు నిర్వహించారు. ఈ తనిఖీల్లో నగరంలోని పలు బంగారు ఆభరణాల షోరూంలు, లాడ్జీలు, హోటళ్లు పరిశీలనకు గురయ్యాయి.
ఈ కార్యక్రమంలో అడిషనల్ డీసీపీ వెంకటరమణ, ఏసీపీలు వెంకటస్వామి, వేణుగోపాల్, వాసాల సతీష్, ఇన్స్పెక్టర్ రాంచందర్ రావుతో పాటు స్థానిక పోలీస్ అధికారులు పాల్గొన్నారు.
తనిఖీల అనంతరం కమిషనర్ గౌష్ ఆలం జ్యువెలరీ షోరూం మరియు హోటల్ నిర్వాహకులకు పలు కీలక సూచనలు, ఆదేశాలు జారీ చేశారు. భద్రతా ప్రమాణాలను కట్టుదిట్టంగా అమలు చేయాలని స్పష్టం చేశారు.
జ్యువెలరీ షోరూంలకు భద్రతా ఆదేశాలు
బంగారు ఆభరణాల షోరూంలలో అర్హత గల భద్రతా సిబ్బందిని తప్పనిసరిగా నియమించుకోవాలని కమిషనర్ సూచించారు. షోరూం ప్రవేశ ద్వారాల వద్ద డోర్ ఫ్రేమ్ మెటల్ డిటెక్టర్లు (DFMD), లోపలికి వచ్చే కస్టమర్ల తనిఖీకి హ్యాండ్ హెల్డ్ మెటల్ డిటెక్టర్లు (HHMD) వినియోగించాల్సిందిగా ఆదేశించారు.
అత్యవసర పరిస్థితుల్లో వెంటనే స్పందించేందుకు ఎమర్జెన్సీ అలారమ్ వ్యవస్థను ఏర్పాటు చేయాలని, అవి నొక్కిన వెంటనే పోలీసులకు సమాచారం చేరేలా ఆధునిక సాంకేతికతను అనుసంధానం చేయాలని సూచించారు.
హోటళ్లు, లాడ్జీలకు సూచనలు
హోటళ్లు మరియు లాడ్జీలలో గదులు అద్దెకు ఇచ్చే ముందు కస్టమర్ల ఆధార్ కార్డ్ లేదా ఇతర ప్రభుత్వ గుర్తింపు పత్రాలను తప్పనిసరిగా సేకరించాలని ఆదేశించారు. అలాగే వారు ఇచ్చే ఫోన్ నంబర్లను క్రాస్ చెక్ చేయాలని సూచించారు. అనుమానాస్పద వ్యక్తులు కనిపిస్తే వెంటనే పోలీసులకు సమాచారం ఇవ్వాలని హెచ్చరించారు.
సీసీ కెమెరాల పర్యవేక్షణపై దృష్టి
అన్ని వ్యాపార సంస్థలు, హోటళ్లలో సీసీ కెమెరాలు నిరంతరం పనిచేసేలా చూడాలని, రికార్డింగ్ స్పష్టంగా ఉండేలా బ్యాకప్ సిస్టమ్ నిర్వహించుకోవాలని కమిషనర్ స్పష్టం చేశారు.
నగర ప్రజల ఆస్తి, ప్రాణ రక్షణకు పోలీసులు ఎల్లప్పుడూ సిద్ధంగా ఉంటారని, వ్యాపార సంస్థలు పోలీసు నిబంధనలను పాటిస్తూ భద్రతా వ్యవస్థలో భాగస్వాములు కావాలని ఆయన పిలుపునిచ్చారు. భద్రతా ప్రమాణాల్లో నిర్లక్ష్యం వహిస్తే చట్టపరమైన చర్యలు తప్పవని హెచ్చరించారు.
