ఫ్రాన్స్: ప్రపంచవ్యాప్తంగా వనరుల కొరత లేదని, దేశాల మధ్య పరస్పర నమ్మకం లోపించడమే నేటి ప్రపంచం ఎదుర్కొంటున్న అతిపెద్ద సవాల్ అని ప్రధానమంత్రి నరేంద్ర మోదీ పేర్కొన్నారు. ఫ్రాన్స్లో నిర్వహించిన జీ7 సదస్సులో భాగంగా మంగళవారం జరిగిన ‘ఔట్రీచ్ సెషన్’లో పాల్గొన్న ఆయన, అంతర్జాతీయ సహకారం, నూతన భాగస్వామ్యాల నిర్మాణం, ప్రపంచ ఐక్యత అవసరంపై తన అభిప్రాయాలను వెల్లడించారు.
“నూతన భాగస్వామ్యాల నిర్మాణం, అంతర్జాతీయ సంఘీభావం పునరుద్ధరణ” అనే అంశంపై జరిగిన సమావేశంలో ప్రసంగించిన మోదీ, ప్రపంచం ప్రస్తుతం వనరుల కొరతతో కాకుండా నమ్మకం కొరతతో బాధపడుతోందని అన్నారు. దేశాల మధ్య విశ్వాసాన్ని తిరిగి నెలకొల్పడం ద్వారానే స్థిరమైన అభివృద్ధి, శాంతి, సహకారం సాధ్యమవుతుందని స్పష్టం చేశారు.
“నేటి ప్రపంచంలో పరస్పర విశ్వాసమే అత్యంత విలువైన వ్యూహాత్మక ఆస్తి. భాగస్వామ్యాల భవిష్యత్తు ఈ విశ్వాసాన్ని ఎంత బలంగా పునరుద్ధరిస్తామన్న దానిపైనే ఆధారపడి ఉంటుంది” అని మోదీ పేర్కొన్నారు. అనంతరం తన ప్రసంగంలోని ముఖ్యాంశాలను సామాజిక మాధ్యమ వేదిక ‘ఎక్స్’ ద్వారా పంచుకున్నారు.
ఈ సందర్భంగా భారతీయ తత్వశాస్త్రంలోని “వసుధైవ కుటుంబకం” భావనను మోదీ ప్రస్తావించారు. ప్రపంచమంతా ఒకే కుటుంబమనే ఆలోచన నేటి అంతర్జాతీయ సంబంధాలకు మరింత అవసరమని పేర్కొన్నారు. దాత-గ్రహీత సంబంధాల నుంచి ప్రపంచం బయటపడాలని, పరస్పర గౌరవం, ఆత్మగౌరవం, సమానత్వం ఆధారంగా కొత్త భాగస్వామ్యాలను నిర్మించుకోవాలని ఆయన సూచించారు.
అంతర్జాతీయ సౌర కూటమి (ఇంటర్నేషనల్ సోలార్ అలయన్స్), మిషన్ లైఫ్ (లైఫ్స్టైల్ ఫర్ ఎన్విరాన్మెంట్) వంటి కార్యక్రమాల ద్వారా ప్రపంచ సంక్షేమం కోసం భారత్ చేపడుతున్న చర్యలను మోదీ వివరించారు. వాతావరణ మార్పులు, సుస్థిర అభివృద్ధి, పర్యావరణ పరిరక్షణ వంటి అంశాల్లో భారత్ ప్రపంచానికి మార్గనిర్దేశం చేస్తోందని పేర్కొన్నారు.
అలాగే, అభివృద్ధి చెందుతున్న దేశాల సమూహమైన ‘గ్లోబల్ సౌత్’ దేశాల గళాన్ని అంతర్జాతీయ వేదికలపై వినిపించడంలో భారత్ ఎప్పుడూ ముందుంటుందని ప్రధాని పునరుద్ఘాటించారు. ప్రపంచ నిర్ణయ ప్రక్రియల్లో అభివృద్ధి చెందుతున్న దేశాలకు తగిన ప్రాతినిధ్యం కల్పించాల్సిన అవసరాన్ని ఆయన మరోసారి గుర్తుచేశారు.
జీ7 సదస్సు పర్యటనలో భాగంగా కెనడా ప్రధాని మార్క్ కార్నీతో పాటు పలువురు ప్రపంచ నాయకులతో మోదీ ద్వైపాక్షిక సమావేశాలు నిర్వహించారు. వాణిజ్యం, సాంకేతికత, పెట్టుబడులు, ప్రపంచ భద్రత వంటి అంశాలపై చర్చలు జరిపినట్లు సమాచారం.
ప్రపంచ స్థాయిలో పెరుగుతున్న భౌగోళిక, ఆర్థిక సవాళ్ల మధ్య దేశాల మధ్య విశ్వాసం, సహకారం, సమాన భాగస్వామ్యాల అవసరాన్ని మోదీ తన ప్రసంగంలో ప్రత్యేకంగా నొక్కి చెప్పడం ప్రాధాన్యత సంతరించుకుంది.
