దేశ రాజధాని ఢిల్లీలో బుధవారం తెల్లవారుజామున భారీ అగ్నిప్రమాదం చోటుచేసుకుంది. సెంట్రల్ ఢిల్లీలోని ఉద్యోగ్ భవన్ సమీపంలోని కార్మికులు నివసించే తాత్కాలిక నివాస ప్రాంతంలో మంటలు చెలరేగి పలు గుడిసెలు పూర్తిగా దగ్ధమయ్యాయి. అయితే ఈ ప్రమాదంలో ఎటువంటి ప్రాణనష్టం జరగకపోవడంతో అధికారులు, స్థానికులు ఊపిరి పీల్చుకున్నారు.
అధికారుల వివరాల ప్రకారం, మంగళవారం అర్ధరాత్రి సమయంలో ఓ విద్యుత్ ప్యానెల్లో మంటలు ప్రారంభమయ్యాయి. అనంతరం అవి వేగంగా సమీపంలోని తాత్కాలిక నివాసాలకు వ్యాపించాయి. అదే సమయంలో అక్కడ నిల్వ ఉంచిన కొన్ని ఎల్పీజీ గ్యాస్ సిలిండర్లు పేలిపోవడంతో మంటలు మరింత తీవ్రరూపం దాల్చాయి. దీంతో అగ్నికీలలు ఎగసిపడుతూ పరిసర ప్రాంతాలను భయాందోళనకు గురిచేశాయి.
ప్రమాదం సంభవించిన ప్రాంతంలో సెంట్రల్ విస్టా ప్రాజెక్టులో పనిచేస్తున్న కార్మికులు నివసిస్తున్నట్లు అధికారులు తెలిపారు. అర్ధరాత్రి సమయంలో మంటలు చెలరేగడంతో కార్మికులు అప్రమత్తమై బయటకు పరుగులు తీయడంతో పెద్ద ప్రమాదం తప్పినట్లు సమాచారం.
సమాచారం అందుకున్న వెంటనే ఢిల్లీ ఫైర్ సర్వీస్ సిబ్బంది ఘటనా స్థలానికి చేరుకుని సహాయక చర్యలు ప్రారంభించారు. మంటల తీవ్రతను దృష్టిలో ఉంచుకుని ఈ ఘటనను అధికారులు ‘మేక్-4 కేటగిరీ’ అగ్నిప్రమాదంగా ప్రకటించారు. 20కి పైగా అగ్నిమాపక వాహనాలు, వాటర్ బౌజర్ల సహాయంతో గంటల తరబడి శ్రమించి మంటలను అదుపులోకి తీసుకువచ్చారు.
బుధవారం ఉదయం 5:30 గంటల ప్రాంతంలో మంటలు పూర్తిగా నియంత్రణలోకి వచ్చినట్లు అగ్నిమాపక శాఖ అధికారులు వెల్లడించారు. ప్రమాదంలో గుడిసెలు, గృహోపకరణాలు, ఇతర వస్తువులు అగ్నికి ఆహుతైనప్పటికీ, ఎటువంటి ప్రాణనష్టం జరగకపోవడం ఉపశమనం కలిగించే అంశమని పేర్కొన్నారు.
కాగా, అగ్నిప్రమాదానికి గల ఖచ్చితమైన కారణాలపై అధికారులు దర్యాప్తు చేపట్టారు. విద్యుత్ షార్ట్సర్క్యూట్ కారణంగానే ప్రమాదం సంభవించి ఉండొచ్చని ప్రాథమికంగా భావిస్తున్నప్పటికీ, పూర్తి వివరాలు విచారణ అనంతరం వెల్లడయ్యే అవకాశం ఉంది.
