కొమురం భీం ఆసిఫాబాద్ జిల్లా, కాగజ్నగర్ పట్టణ ప్రజలకు మెరుగైన మౌలిక వసతులు అందించడమే తమ ప్రధాన లక్ష్యమని ఉమ్మడి ఆదిలాబాద్ జిల్లా ఎమ్మెల్సీ దండే విఠల్ స్పష్టం చేశారు. కాగజ్నగర్ మున్సిపాలిటీ పరిధిలోని కాపువాడలో సుమారు రూ.70 లక్షల వ్యయంతో చేపట్టనున్న నూతన సీసీ రోడ్డు నిర్మాణ పనులకు ఆయన ముఖ్య అతిథిగా హాజరై భూమిపూజ చేసి పనులను ఘనంగా ప్రారంభించారు.
ఈ సందర్భంగా నిర్వహించిన కార్యక్రమంలో ఎమ్మెల్సీ దండే విఠల్ మాట్లాడుతూ, ప్రజలు ఎన్నో సంవత్సరాలుగా ఎదుర్కొంటున్న రోడ్డు సమస్యలను గుర్తించిన ప్రభుత్వం వాటి పరిష్కారానికి ప్రాధాన్యత ఇస్తోందన్నారు. కాంగ్రెస్ ప్రభుత్వం అధికారంలోకి వచ్చిన తర్వాత ప్రజల అవసరాలను దృష్టిలో ఉంచుకుని అభివృద్ధి కార్యక్రమాలను వేగవంతం చేసిందని తెలిపారు.
ప్రజలకు మెరుగైన రవాణా సౌకర్యాలు, మౌలిక వసతులు కల్పించేందుకు ప్రభుత్వం కట్టుబడి ఉందని ఆయన పేర్కొన్నారు. కాపువాడ ప్రాంతంలో నిర్మించనున్న సీసీ రోడ్డు వల్ల స్థానిక ప్రజలకు ప్రయాణ సౌలభ్యం పెరగడంతో పాటు వర్షాకాలంలో ఎదురయ్యే ఇబ్బందులు కూడా తగ్గుతాయని అన్నారు.
ఈ కార్యక్రమంలో మున్సిపల్ చైర్మన్ షాహిన్ సుల్తానా, మున్సిపల్ కౌన్సిలర్లు, సంబంధిత శాఖల అధికారులు, కాంగ్రెస్ పార్టీ నాయకులు, కార్యకర్తలు మరియు వార్డు ప్రజలు పెద్ద సంఖ్యలో పాల్గొన్నారు. స్థానికులు రోడ్డు నిర్మాణ పనులు ప్రారంభమైనందుకు హర్షం వ్యక్తం చేస్తూ ప్రజా ప్రతినిధులకు కృతజ్ఞతలు తెలిపారు.
